MANILA, Philippines – Sinabi ni Manila 3rd District Rep. Joel Chua na pinag-aaralan pa ng House prosecution panel ang posibleng pagdagdag ng mga “high profile” witnesses sa impeachment trial ni Vice President Sara Duterte sa Senado.
Ayon kay Chua, may mga personalidad na kinokonsidera pa ang panel ngunit hindi muna nila isiniwalat ang mga pangalan dahil hindi pa ito pinal.
“May mga kinu-consider pa po kami. Pero as of now, hindi pa namin pwedeng i-disclose dahil pinapafinalize pa lahat ito. But when the proper time comes, siguro ide-divulge din po namin,” aniya.
Una nang sinabi ni Batangas 2nd District Rep. Gerville “Jinky Bitrics” Luistro, lead prosecutor, na humigit-kumulang 25 witnesses ang isinasaalang-alang para sa kaso.
Ang impeachment case laban kay VP Duterte ay may kinalaman sa umano’y maling paggamit ng ₱612.5 milyong confidential funds, hindi tamang deklarasyon sa SALN, unexplained wealth, at umano’y death threats laban sa ilang matataas na opisyal.
Ayon kay Chua, karamihan sa mga testigo ay posibleng kaugnay ng isyu ng confidential funds at unexplained wealth.
Dagdag niya, nakatakdang isumite ng prosecution panel ang pre-trial brief sa Hunyo 15, bilang paghahanda sa pre-trial conference sa Hunyo 18 sa Senado.
Sa naturang conference, pag-uusapan ang stipulation of facts, marking of evidence, at listahan ng mga testigo upang maiwasan ang sorpresa sa aktwal na paglilitis.
Ayon pa kay Chua, hindi ito ipapalabas sa publiko at hindi rin ito live na ibo-broadcast ng media. RNT/MND
