MANILA, Philippines – Isasampa na sa Department of Justice (DOJ) sa Biyernes ang mga kaso kaugnay ng pagkamatay ng mga manlalaro ng Ateneo na sina Rene Clert Baterbonia at Divine Adili matapos halos matapos na ang imbestigasyon ng mga awtoridad, ayon kay Department of the Interior and Local Government Secretary Jonvic Remulla nitong Miyerkules.
Ayon kay Remulla, nasa huling yugto na ang imbestigasyon at ilan na lamang na dating manlalaro at opisyal ng Ateneo ang kailangan pang makapanayam.
“Halos tapos na ang imbestigasyon namin. Medyo conclusive na. Sa Biyernes, isusumite namin sa DOJ for filing ang kaso,” ani Remulla.
Nasawi sina Baterbonia at Adili habang nasa isang team-building activity sa Aurora noong Hunyo 8, na naging dahilan upang magsagawa ng malawakang imbestigasyon ang mga awtoridad.
Kabilang sa mga ipinatawag ng mga imbestigador sina Ateneo officials Roberto Yap, na humarap sa Philippine National Police-Criminal Investigation and Detection Group (PNP-CIDG) noong Miyerkules, at Manuel V. Pangilinan, na inaasahang haharap naman sa Huwebes.
Natanong na rin ng mga imbestigador si Fr. Nemesio “Nemi” Que, vice president for social development ng Ateneo, bilang bahagi ng nagpapatuloy na imbestigasyon.
Sinabi ni Remulla na halos 100 katao na ang nakapanayam sa loob ng dalawang linggong imbestigasyon at nakalikom na ng humigit-kumulang 1,200 pahina ng mga testimonya.
“This investigation has been going on for the last two weeks. We’ve interviewed almost 100 people. We have, siguro, 1,200 pahina ng testimonya nanggaling sa mga tao doon,” aniya.
Dagdag pa ni Remulla, “very confident” ang PNP-CIDG sa lakas ng kanilang case buildup kaugnay ng insidente. Santi Celario
