MANILA, Philippines – Nanawagan ang Land Transportation Franchising and Regulatory Board (LTFRB), sa ilalim ng pamumuno ni DOTr Secretary Giovanni ‘Banoy’ Z. Lopez, sa mga drayber na iwasan ang pag-vlog o anumang aktibidad na lumilikha ng content para sa social media habang nagmamaneho ng mga pampublikong sasakyan (PUV).
Sinabi ni LTFRB Chairman Atty. Vigor D. Mendoza II na ang mga ganitong gawain ay itinuturing na paglabag sa Republic Act No. 10913, o ang “Anti-Distracted Driving Act.” Ang batas na ito ay ipinatupad upang protektahan ang publiko laban sa mga aksidente sa kalsada na dulot ng paggamit ng mga mobile communication device at electronic entertainment o computing device habang nagmamaneho.
“Nanawagan kami sa mga operator at drayber na isaisip ang batas na ito, hindi lamang para sa kaligtasan ng mga pasahero sa loob ng PUV kundi pati na rin sa iba pang gumagamit ng kalsada,” pahayag ni Chairman Mendoza.
Alinsunod ito sa direktiba ni Pangulong Ferdinand “Bongbong” R. Marcos, Jr. na mahigpit na ipatupad ang mga batas at iba pang tuntunin at regulasyon para sa kaligtasan sa kalsada.
Upang higit na mapalakas ang pagpapatupad ng “Anti-Distracted Driving Act,” naglabas ang LTFRB ng memorandum circular para sa mga operator ng PUV. Pinapayuhan sila nito na tiyaking mahigpit na sinusunod ang batas upang maiwasan hindi lamang ang mga aksidente sa kalsada kundi pati na rin ang mga problemang legal sakaling mahuli sila.
Kaugnay nito inilabas ang memorandum circular matapos mapansin ng social media team ng LTFRB ang pagdami ng mga vlogger at content creator na gumagawa ng content habang nagmamaneho ng mga PUV.
“Isaisip natin ang kaligtasan ng ating mga pasahero at ng lahat ng gumagamit ng kalsada.” Alam ng lahat na kahit isang iglap ng pagkagambala ay maaaring magresulta sa mga nakamamatay na aksidente sa kalsada,” aniya.
Sinabi ni Chairman Vigor na hindi lamang ito lumalabag kundi sumisira rin sa diwa ng “Anti-Distracted Driving Act” na ginawa upang protektahan ang mga drayber at lahat ng gumagamit ng kalsada mula sa mga pinsala at pagkamatay bilang resulta ng mga aksidente sa kalsada.
Idinagdag niya na ang mga ganitong aksyon ay paglabag din sa pangunahing kondisyon ng bawat Certificate of Public Convenience (CPC) na unahin ang kaligtasan at kaginhawahan ng publiko.
Samantala hinimok ni Chairman Vigor ang mga operator ng PUV na ipaalala sa kanilang mga drayber ang tungkol sa batas, ang mga umiiral na patakaran at regulasyon sa kaligtasan sa kalsada.
Kabilang dito ang vlogging at paglikha ng nilalaman pati na rin ang pakikipag-ugnayan sa social media na nangangahulugang pag-browse, pag-scroll, pag-like, pagkomento, o kung hindi man ay pakikipag-ugnayan sa mga aplikasyon ng social media.
Ang memorandum circular, kapag naipatupad na, ay magpapataw ng P5,000 na multa para sa mga drayber ng PUV na mahuhuli sa vlogging at paglikha ng nilalaman at pakikipag-ugnayan sa social media. (Santi Celario)
