Zuleika Lopez dumating sa Senado

MANILA, Philippines – Dumating sa Senado si Office of the Vice President (OVP) chief-of-staff Zuleika Lopez nitong Huwebes, Hulyo 9.

Ito ay isang araw matapos ipag-utos ng impeachment court ang paglalabas ng subpoena laban sa kanya, kaugnay sa impeachment trial ni Vice President Sara Duterte.

Ayon kay Senate Secretary at Clerk of Court Renato Bantug Jr., binisita ni Lopez ang kanyang opisina para sa coordination meeting sa usapin na “mainly administrative” kabilang ang room assignments, staff access, at wala umanong kaugnayan sa impeachment case.

Tumangging magkomento naman si Lopez nang tanungin sa layunin ng pagbisita.

Sa ikatlong araw ng impeachment proceedings nitong Miyerkules, sinabi ni House prosecutor at Iloilo Representative Lorenz Defensor sa Senate impeachment court na ipipresenta nila ang matagal nang aide ng Bise Presidente bilang isa sa kanilang mga witness sa susunod na linggo.

Ito ay kasunod ng paggiit ng depensa na ang detention ng Kamara kay Lopez at paglilipat sa
Correctional Institute for Women noong 2024 ang dahilan kung bakit nagbanta si Duterte laban kay Pangulong Ferdinand Marcos Jr. at miyembro ng pamilya nito.

Haharap si Lopez sa Martes, Hulyo 14 at tetestigo sa Article 4 ng Articles of Impeachment na nag-aakusa sa Bise Presidente ng
culpable violation of the Constitution, high crimes, at pagsiraw sa tiwla ng publiko, sa umano’y pagpaplano ng assassination laban sa Pangulo at miyembro ng pamilya nito sa pagbibitaw ng ‘grave threats’ at ‘inciting to sedition.’ RNT/JGC