MANILA, Philippines – Nanawagan ang magreretirong Armed Forces of the Philippines (AFP) chief Gen. Romeo Brawner Jr. sa lahat ng opisyal at tauhan ng National Capital Region Command (NCRCOM) na manatiling tapat sa Konstitusyon at sa chain of command.
Ginawa ni Brawner ang panawagan sa kanyang farewell visit sa NCRCOM sa Camp Aguinaldo, Quezon City noong Miyerkules.
Pinuri niya ang mga opisyal, enlisted personnel, at civilian employees ng NCRCOM dahil sa kanilang propesyonalismo, disiplina, at dedikasyon bilang “Sentinels of the Nation’s Capital.”
Hinimok din niya ang mga tauhan ng NCRCOM na manatiling “steadfast in upholding the Constitution, loyal to the chain of command, and committed to serving the Filipino people with integrity, excellence, and honor.”
Sinamahan si Brawner ni NCRCOM commander Maj. Gen. Gregorio Hernandez Jr., na nagbigay ng ulat sa mga nagawa ng yunit at nagpakita ng capability demonstration at static display ng kahandaan ng NCRCOM sa pagpapanatili ng seguridad sa National Capital Region.
Nagpasalamat naman si Hernandez kay Brawner sa kanyang pamumuno at suporta na nakatulong sa pagpapalakas ng kakayahan at kahandaan ng NCRCOM.
Si Brawner, miyembro ng Philippine Military Academy Class of 1989, ay magreretiro sa Hulyo 21 matapos ang tatlong taong termino bilang AFP chief, alinsunod sa Republic Act 11709. Bago ito, nagsilbi rin siyang Philippine Army commander mula Disyembre 2021. RNT/MDS
