MANILA, Philippines – Iginiit ni senator-judge Alan Peter Cayetano na maaaring imbestigahan ng National Bureau of Investigation (NBI) ang 2019 Southeast Asian (SEA) Games nang hindi ito inaanunsyo sa publiko.
Aniya, maaari kasi itong makaapekto sa integridad ng impeachment court habang nagpapatuloy ang paglilitis sa impeachment complaint laban kay Vice President Sara Duterte.
Sa ikaanim na araw ng impeachment trial nitong July 15, 2026, sinabi ni Cayetano na wala siyang tutol sa anumang imbestigasyon. Gayunman, kinuwestiyon niya pagpapahayag ng NBI sa publiko sa halip na tahimik na magsagawa muna ng imbestigasyon.
“Go ahead and investigate. First of all, that’s been investigated many, many times. He could have not announced it and (just) investigated. E ‘di imbestigahan mo. (Kung) tingin mo may mali, e ‘di imbestigahan mo,” wika ni Cayetano.
Nagbigay ng pahayag si Cayetano matapos maghayag ng pangamba ang kanyang kapwa senator-judge na si Robinhood Padilla kaugnay ng naging anunsyo ng NBI habang nagpapatuloy ang impeachment trial.
Ayon kay Cayetano, hindi ang imbestigasyon ang kanyang kinukuwestiyon kundi ang naging epekto ng pag-aanunsyo nito sa kredibilidad ng impeachment court.
“We have to make sure that the integrity of the court is intact. I hope this issue of the integrity of the court becomes an issue for all of us,” sabi niya.
“Investigate whatever you want to investigate. You want to investigate kung bakit ako nagpatubo ng balbas, i-investigate mo, no problem with me. Pero huwag mo nang i-announce kasi nga naaapektuhan y’ung integrity ng [impeachment] court,” dagdag niya.
Sinabi rin ni Cayetano na ilang ulit nang naimbestigahan ang SEA Games, kabilang na sa Senado at sa Office of the Ombudsman kung saan personal siyang humarap upang sagutin ang mga tanong kaugnay ng pagho-host ng Pilipinas sa regional sporting event.
Tinawag din niyang isang “misfire” ang naging anunsyo ng NBI at pinabulaanan ang pahayag ni NBI Director Melvin Matibag na iniuugnay siya sa infrastructure component ng SEA Games.
Aniya, hindi ang Philippine Southeast Asian Games Organizing Committee (PHISGOC), na kanyang pinamunuan, ang may pananagutan sa mga proyektong binanggit ng NBI.
“Bakit ko sinabing misfire? [It’s because] I had nothing to do with the infrastructure,” sabi niya.
Ipinagtanggol din ni Cayetano ang naging pagho-host ng Pilipinas sa 2019 SEA Games at sinabing nagbigay ito ng karangalan sa bansa at nagbukas ng mas maraming oportunidad para sa mga atletang Pilipino.
“The SEA Games gave us so much honor. So far, it is still the biggest SEA Games in history. Many of our athletes launched their careers, even going to gold medals in the Olympics,” wika ni Cayetano. Ernie Reyes
