MANILA, Philippines – Sinimulan na ng Land Transportation Franchising and Regulatory Board (LTFRB) ang pagtalakay sa lahat ng nakabinbing petisyon para sa taas-pasahe ng mga jeepney, bus, UV Express, taxi, at motorcycle taxi.
Ayon kay LTFRB Chairperson Atty. Vigor Mendoza II, sinusuri na ng ahensya ang angkop na dagdag-pasahe.
“We are already reviewing and discussing all the pending petitions for fare hike and as per instruction by Secretary Banoy, we have to come up with the recommendation in the soonest possible time,” aniya.
Kabilang sa mga petisyong nire-review ang hiling ng Pagkakaisa ng mga Samahan ng Mga Tsuper at Operator Nationwide na magdagdag ng ₱10 sa minimum na pasahe, pati na rin ang mga petisyon ng Metro Comet Transport Service Cooperative, UV Express National Alliance of the Philippines, United Transportation Coalition of the Philippines, at Manibela.
Ayon sa LTFRB, humihiling ang mga transport group ng dagdag-pasahe dahil sa pagtaas ng gastos sa operasyon, lalo na matapos ang sunod-sunod na pagtaas ng presyo ng langis bunsod ng tensyon sa Middle East.
Noong Hulyo 28, nagtaas ang mga kumpanya ng langis ng hanggang ₱7.30 kada litro, kaya umabot sa ₱93.60 kada litro ang presyo ng regular diesel sa Metro Manila.
Sinabi ni Mendoza na isinasaalang-alang din ng LTFRB ang magiging epekto ng taas-pasahe sa presyo ng mga pangunahing bilihin at sa kakayahan ng mga commuter na makasabay sa dagdag-gastos. Kinokonsulta rin ang iba pang ahensya ng gobyerno at mga stakeholder.
“We assure everybody that the LTFRB will always take the path of measures that recognizes the interest of the [public utility vehicle] sector but ensuring that the welfare of commuters and the general public are protected,” dagdag niya.
Noong Hulyo 22, nagsagawa ng dalawang araw na protesta ang ilang transport group sa Quezon City upang igiit ang pagpapatupad ng dagdag-pasahe at punahin ang umano’y kabiguan ng Department of Energy na protektahan ang interes ng publiko. RNT/MDS
