MANILA, Philippines – Pinatawag ng Land Transportation Franchising and Regulatory Board (LTFRB), sa ilalim ng pamumuno ni DOTr Secretary Giovanni “Banoy” Z. Lopez, ang mga operator ng apat na public utility vehicle (PUV) na sangkot sa sunod-sunod na banggaan ng mga sasakyan sa Maynila na nagresulta sa pagkasugat ng 13 katao.
Sinabi ni Acting LTFRB Chairman Atty. Greg G. Pua, Jr. na naglabas na sila ng mga show cause order (SCO) sa mga operator ng mga PUV, kabilang ang dalawang pampasaherong jeepney at isang motorcycle taxi.
Kasabay nito, inatasan ni Acting Chairman Pua ang mga kinauukulang insurance provider na agad bayaran ang mga gastusin sa ospital ng mga nasugatang biktima, at inatasan ang Regional Franchising Regulatory Office (RFRO) sa Metro Manila na bantayan at tiyakin ang pagsunod sa mga direktiba.
Hindi bababa sa 13 katao ang nasugatan sa aksidente sa kalsada na naganap noong Agosto 25 sa Ramon Magsaysay Flyover (dating Nagtahan Bridge) sa Sta. Mesa, Maynila.
Batay sa paunang imbestigasyon ng traffic police, nawalan ng preno ang isa sa dalawang jeepney at nabangga nito ang isa pang pampasaherong jeepney na nasa unahan nito. Nagdulot ito ng sunod-sunod na banggaan dahil tumama rin ang jeepney sa isang motorcycle taxi at isa pang sasakyan.
Sinabi ni Acting Chairman Pua na inatasan ang lahat ng operator na magsumite ng nakasulat at notarized na paliwanag kung bakit hindi dapat suspindihin o kanselahin ang kanilang mga prangkisa.
“Nais naming malaman kung ano ang nangyari, at isa sa mga partikular na isyung nais naming suriin ay ang ulat ng pulisya na ang sanhi ng insidente ay isang pampasaherong jeepney na nawalan ng preno,” pahayag ni Acting Chairman Pua.
Sinabi niya na inatasan na rin ang operator ng nasabing pampasaherong jeepney na ihanda ang lahat ng dokumento kaugnay ng rehistro ng sasakyan, partikular na ang aspeto ng road worthiness o kaligtasan ng sasakyan sa kalsada.
Ipinadala rin ang parehong kautusan sa tatlo pang ibang operator. Itinakda ang pagdinig sa Setyembre 10.
Kaugnay ng operator ng pampasaherong jeepney na umano’y naging sanhi ng aksidente sa kalsada, nahaharap ang operator sa mga kasong pagkuha ng pabayang drayber at pagkabigong magbigay ng ligtas at komportableng pampublikong transportasyon. (Santi Celario)
