MANILA, Philippines – Sumailalim ngayon sa masusing pagsusuri ang cybersecurity infrastructure ng Maritime Industry Authority o MARINA kasunod ng cyber attack sa Seafarer’s Identity Document at Seafarer’s Record Book system.
Ito ay matapos makita ng technical team na may mga international IP addresses sa kanilang security monitoring at may mga kahina-hinalang activity na na-detect at na-block ng firewall.
Hindi naman binanggit ng MARINA kung anong bansa o pangalan ang nasa likod ng insidente dahil nagpapatuloy pa ang forensic investigation kasama ang Department of Information and Communications Technology.
Tiniyak naman ni MARINA Administrator Sonia Malaluan na walang mahalagang datos ang nakuha sa insidente.
Inamin naman ng MARINA na ang kasalukuyang system ay binuo pa noong 2017 kaya nangangailangan na ng system refresh at posibleng hardware upgrade. Jocelyn Tabangcura-Domenden
