BASILAN, Philippines – Nagpakilos ang Philippine National Police (PNP) ng mga yunit para tumulong sa manhunt operation laban sa mga nasa likod ng pag-ambush sa military convoy sa Tipo-Tipo, Basilan na ikinasugat ng hindi bababa sa 10 sundalo.
Sinabi ni PNP chief Gen. Jose Melencio C. Nartatez Jr. na mahigpit ang koordinasyon ng PNP sa Armed Forces of the Philippines (AFP) upang tugisin ang mga gunmen at iba pang responsable sa pag-atake.
“Every attack against our security forces is a challenge to the peace and order we are sworn to protect. The PNP will stand with the AFP in pursuing those responsible, strengthening our security posture, and ensuring that justice is served without compromising the safety of our communities,” ani Nartatez.
“We will remain vigilant and resolute until those behind this attack are held accountable under the law,” dagdag niya.
Inambush ng mga hindi pa nakikilalang armadong lalaki ang convoy habang binabaybay nito ang kalsada sa Barangay Badja noong Oktubre 5. Batay sa paunang imbestigasyon, posibleng pagganti ang insidente na umano’y isinagawa ng isang armadong grupo sa lugar kasunod ng mga operasyon ng militar nitong mga nakaraang buwan.
Agad dinala sa ospital ang mga sugatang sundalo para sa gamutan habang nagpapatuloy ang assessment ng mga security forces sa insidente.
Bukod sa pagtugis sa mga salarin, inatasan din ni Nartatez ang mga police unit sa Basilan at karatig-lugar na manatiling alerto upang maiwasan ang posibleng panibagong banta at mapanatili ang peace and order.
“Whatever the motive behind this attack, violence cannot be allowed to undermine the peace and security of our communities. We will pursue every lead, strengthen our coordination with the military, and hold those responsible accountable through the rule of law,” ani Nartatez. RNT/MDS
