Bagong linear park, binuksan sa Pasig

MANILA — Pormal nang binuksan sa publiko ang redeveloped Ilaya Buting Linear Park sa Barangay Buting, Pasig City matapos itong pasinayaan ng Metropolitan Manila Development Authority (MMDA) at Pasig City government nitong Oktubre 8.

Isinagawa ang proyekto sa ilalim ng Local Government Support Fund (LGSF) sa pamamagitan ng Green Green Green Program ng MMDA, bilang bahagi ng direktiba ni Pangulong Ferdinand Marcos Jr. na dagdagan ang mga green at open spaces sa Metro Manila.

Ayon kay MMDA Chairman Atty. Don Artes, naging posible ang proyekto dahil sa pagtutulungan ng national government at Pasig City government. Ito na rin aniya ang ikatlong linear park na naitayo sa lungsod.

Hinimok ni Artes ang mga residente ng Barangay Buting na ituring ang parke na parang sarili nilang pag-aari at sama-samang pangalagaan ang kalinisan at kaayusan nito.

Nangako rin ang MMDA chief na madadagdagan pa ang mga halaman sa parke at planong lagyan ito ng vertical garden o greenhouse na maaaring pakinabangan ng mga residente.

Samantala, sinabi ni Pasig City Mayor Victor Ma. Regis “Vico” Sotto na mahalaga ang ganitong proyekto dahil limitado ang mga open at green spaces sa lungsod.

Ayon kay Sotto, kulang ang Pasig sa mga playground at parke kung kaya’t malaking bagay ang pagkakaroon ng mga lugar kung saan ligtas na makapaglalaro, makapagpapahinga at makapagtitipon ang mga bata at senior citizen.

Kasabay nito, hinikayat din ng alkalde ang mga taga-Buting na pangalagaan ang bagong parke upang mapakinabangan ito nang matagal ng buong komunidad.

Mayroon itong playground at exercise equipment, basketball court, public comfort rooms at mga ilaw, na idinisenyo upang magsilbing community green space para sa pagpapahinga, pag-eehersisyo at pakikipagkapwa.

Umaasa ang MMDA at Pasig LGU na magiging dagdag na ligtas at maaliwalas na lugar ang Ilaya Buting Linear Park para sa mga residente, lalo na sa mga batang nangangailangan ng espasyo para maglaro at sa mga senior citizen na nais magpahinga at makisalamuha. JAY Reyes