CALAX malapit nang makumpleto

MANILA, Philippines – Malapit nang makumpleto ang Cavite-Laguna Expressway (CALAX), na magbibigay ng mas direktang biyahe sa pagitan ng Cavite at Laguna at mag-uugnay sa Cavite Expressway (CAVITEX) sa pamamagitan ng CAVITEX-CALAX Link (CCLink).

Ayon sa MPCALA Holdings, Inc., nagpapatuloy ang konstruksyon sa natitirang 18.5 kilometro ng 45-kilometrong expressway, partikular sa Subsections 1 at 2.

Kabilang sa mga isinasagawang trabaho ang road pavements, mga tulay, drainage system, interchange ramps at iba pang imprastraktura.

Sa kasalukuyan, bukas na sa mga motorista ang CALAX mula Mamplasan sa Biñan, Laguna hanggang Governors Drive sa General Trias, Cavite.

Kapag nakumpleto ang natitirang mga seksyon, mapapalawig ang expressway hanggang Open Canal at Kawit, Cavite.

Inaasahang magbibigay ang kumpletong CALAX ng alternatibong ruta sa mga pangunahing kalsada sa Cavite at Laguna, gayundin ng mas maayos na biyahe patungong Metro Manila.

Mapapadali rin nito ang pagpunta sa mga residential, commercial at industrial area sa rehiyon.

Makikinabang din dito ang mga negosyo at logistics operator dahil mapapahusay ang koneksyon sa pagitan ng mga industrial zone, bodega, distribution hub, commercial center at pangunahing pamilihan sa Cavite, Laguna at Metro Manila.

Sa mas maayos na koneksyon ng mga expressway, inaasahang magiging mas episyente ang paghahatid ng mga produkto, hilaw na materyales at iba pang kargamento.

Maaari rin nitong mapadali ang pagbiyahe ng mga manggagawa at transportasyon ng mga suplay sa mahahalagang sentrong pang-ekonomiya.

Ang CALAX ay isang Public-Private Partnership (PPP) project kung saan ang Department of Public Works and Highways (DPWH) ang kinatawan ng pamahalaan, habang ang MPCALA Holdings, Inc., isang subsidiary ng Metro Pacific Tollways Corporation, ang pribadong concessionaire. RNT