Witness sa impeachment trial ni VP Sara, ‘di takot sa confidentiality violations

MANILA, Philippines – Inihayag ng prosecution witness at forensic financial analyst na si Atty. Alexander Cabrera nitong Lunes na hindi siya natatakot o nababahala sa posibleng paglabag sa confidentiality laws nang tanggapin niya ang mga financial record ni Vice President Sara Duterte para suriin.

Inihayag ito ni Cabrera sa cross-examination ni defense counsel Atty. Kristine Ferrer, na nagbanggit ng mga probisyon ng Anti-Money Laundering Act o AMLA, Bank Secrecy Law, at National Internal Revenue Code (NIRC).

Binasa ni Ferrer ang Section 8A ng RA 9160 o AMLA, na nagbabawal sa mga opisyal at empleyado ng AMLC na ibunyag ang anumang impormasyong nalaman nila dahil sa kanilang trabaho.

Binanggit din niya ang Section 14C at 14D ng binagong AMLA na may kasamang parusang pagkakulong at multa.

“I will no longer specify the penalties, but it includes imprisonment and a fine, but this is not meant to scare you,” sabi ni Ferrer.

“I’m not scared naman po,” tugon ni Cabrera.

Muli siyang tinanong: “As a lawyer, you did not feel concerned about the furnishing of AMLC documents to you, and information also to you without the permission of the impeachment court may violate these provisions recited earlier?”

“Dahil natake up na po sa House, at dahil napagtalunan na po sa House, ang nasa isip ko ay, okay lang na tanggapin ko,” paliwanag ni Cabrera, tinutukoy ang pagdinig ng House justice panel sa impeachment complaint laban kay Duterte.

Binanggit din ni Ferrer ang Section 2 ng Bank Secrecy Law na nagsasabing “all deposits of whatever nature with banks or banks investments… are hereby considered as of an absolutely confidential nature.”

“Having known this law, as a lawyer, you did not feel concerned also by the furnishing of copies of bank docs to you without the authority of the impeachment court?” tanong muli ng abogada.

“Kaya hindi po ako concern kasi sa [RA] 3019 po na siya pong Sec 8 na nagsasabing yung acquisition of property na manifestly disproportionate sa income sinasabi po niya na bank deposits shall be taken into consideration,” sagot ni Cabrera, pero pinutol siya ni Ferrer.

Tinukoy din ni Ferrer ang Section 270 ng NIRC na nagbabawal sa mga tauhan ng BIR na magbulgar ng confidential information mula sa mga taxpayer.

“Hindi ko po problema maging concerned po doon eh. Tatanggapin ko lang po yung document at akin pong i-examine at bibigyan po ng analysis,” pag-ulit ni Cabrera. Ernie Reyes