Nabulgar na P817M hidden wealth ni VP Sara, Carpio inaasahang babanggain ng defense team

MANILA, Philippines – Sa ika-38 araw ng impeachment trial ni Vice President Sara Duterte, inaasahang hahamunin ng kanyang kampo ang mga natuklasan ni forensic financial analyst Alexander Cabrera, hinggil sa P817.87 milyon na hindi maipaliwanag na yaman ng bise presidente at asawang si Atty. Manases Carpio mula 2022 hanggang 2025.

Ipinakita ni Cabrera ang kanyang report noong Oktubre 9 bilang bahagi ng paglilitis sa mga paratang ng maling pag-uugali laban kay Duterte.

Ang report ay batay sa pagsusuri sa mga bank at tax record nina Duterte, Carpio at ng kanilang mga negosyo, gayundin sa mga Statement of Assets, Liabilities and Net Worth (SALN) ng bise presidente.

Inaasahang tutulan ng depensa ang mga sumusunod na pahayag ni Cabrera:

· Ang P817.87 milyon na hindi maipaliwanag na yaman ay binubuo ng P207.7 milyon na hindi idineklarang cash, P143.5 milyon na hindi idineklarang personal at real properties, at P111.85 milyon na hindi idineklarang income na iniuugnay kina Duterte at Carpio;

· Ang P142.2 milyon na hindi idineklarang income mula sa Cale 88 Foods Corp. at Metro Chow King Food Corp., at P212.63 milyon mula sa Gencorp Industries Inc. mula 2022 hanggang 2025;

· Sinabi ni Cabrera na hindi totoo ang mga SALN ni Duterte mula 2022 hanggang 2025 dahil hindi iniulat ang malaking bahagi ng ari-arian ng bise presidente at kanyang asawa;

· Iginiit din niya na patuloy na nakikilahok si Duterte sa iba’t ibang negosyo kahit nanunungkulan na bilang bise presidente;

· Ayon kay Cabrera, ang kanyang P817.87 milyon na pagtatantya ay batay lamang sa limitadong dokumentong kanyang sinuri, at hindi pa kasama rito ang mga record na sinasabing nasa pangangalaga nina Duterte at Carpio;

· Dagdag pa ng analyst, ang mga nasabing pagtatago ay nagpapakita ng taun-taong paglabag sa Konstitusyon mula 2022 hanggang 2025;

· Binanggit din sa report ang posibleng paglabag sa iba pang batas kabilang ang National Internal Revenue Code, Republic Act No. 1379 o ang batas laban sa hindi maipaliwanag na yaman, Code of Conduct and Ethical Standards for Public Officials and Employees, at Anti-Graft and Corrupt Practices Act. Ernie Reyes