VALENZUELA CITY, Philippines – Pinagtibay ng Lungsod ng Valenzuela sa ilalim ng pamumuno ni Mayor Wes Gatchalian ang katayuan at dedikasyon nito bilang pangunahing sentro ng negosyo, matapos muling hirangin bilang Most Business-Friendly Local Government Unit (LGU) ng Philippine Chamber of Commerce and Industry (PCCI) sa katatapos lamang na 2026 Most Business-Friendly LGU Awards na ginanap sa The Manila Hotel, nitong Oktubre 14.
Ang pinakabagong karangalang ito ay dagdag sa ipinagmamalaking kasaysayan ng kahusayan ng Valenzuela City sa lokal na pamamahala at pagpapaunlad ng negosyo. Dati nang natanggap ng lungsod ang prestihiyosong parangal noong 2012, 2014, at 2015—na nagbigay-daan upang makamit nito ang “Hall of Fame” status—at muli itong kinilala noong 2019, 2020, at ngayong taon.
Binibigyang-diin ng pagkilalang ito ang dedikasyon ng lungsod sa inobasyon, mahusay na pamamahala, at napapanatiling pag-unlad ng ekonomiya sa pamamagitan ng digital na transpormasyon, pagpapahusay sa mga proseso ng negosyo, at mga programang inklusibo para sa komunidad.
Sa larangan ng inobasyon at digital na transpormasyon, patuloy na ginagamit ng lungsod ang teknolohiya tulad ng V-Link Business Registry Platform, Local Price Monitoring Website, V-Employed Digital Job Matching Platform, Val-ID Validation Portal, at iHub/V-SPark Startup Discovery and Innovation Development Program na layong palakasin ang koneksyon sa pagitan ng mga negosyo, mapabuti ang akses sa trabaho, at suportahan ang mga umuusbong na negosyante at innovator.
Pinabibilis naman ng #PaspasPermit at 3S Plus Integrated Processing System ng lungsod ang aplikasyon para sa mga permit sa negosyo gamit ang mga awtomatikong sistema at pinasimpleng pamamaraan—kung saan ang mga kwalipikadong transaksyon ay napoproseso sa loob lamang ng 10 segundo. Ito ay nagpapatibay sa pangako ng lungsod sa mahusay at transparent na serbisyo publiko, na kinumpirma rin ng pagkilala mula sa Anti-Red Tape Authority (ARTA) bilang “Fastest-Processing LGU” noong Hunyo 2026.
Patuloy ding isinusulong ng lungsod ang isang inklusibo at napapanatiling paglago ng ekonomiya sa pamamagitan ng mga programang nagtataguyod ng trabaho, pangangalaga sa kapaligiran, at inklusyong panlipunan.
Ang mga inisyatiba tulad ng Employers Forum at Job Fair Program, Dalandanan Water Catchment Basin Project, Operation Balik Linis Ganda, mga proyektong solar energy para sa mga pampublikong pasilidad, Tugon Sulit Store Program, SPED Work and Inclusive Employment Program, pati na ang Flood Advisory Committee at Urban Drainage Master Plan, ay sumasalamin sa mga pagsisikap ng lungsod na bumuo ng isang matatag at pantay na pamayanan. (Merly Duero)
