MANILA, Philippines- Alerto ang Armed Forces of the Philippines laban sa mga sundalong nire-recruit bilang analysts ng China-based firms na nagpapanggap na mula sa Western countries subalit inihayag na walang indikasyong may sumaling aktibong military personnel.
Nagbabala ang Department of Information and Communications Technology noong nakaraang linggo laban sa mga kompanyang nagpapanggap na nakabase sa US o sa Europe, na nagre-recruit umano ng retired at active duty military personnel sa part-time jobs.
“Wala pa tayong actual na report as to the personality nitong mga taong involved, kasi yung iba pong andun sa comment section apparently ay already out of the service,” pahayag ni Col. Francel Margareth Padilla, AFP spokesperson, sa isang panayam.
Bagama’t bubusisiin pa ito, sinabi ni Padilla na nagbabala na ang military leadership sa mga sundalo upang hindi mahikayat na pumasok dito.
“On a daily basis, meron naman po talaga tayong mga talk to troops down the lines hanggang sa pinakamababang units ng armed forces. So we remind them to be wary of these things,” anang opisyal.
Aniya, patuloy ang online recruitment mula noong Disyembre. RNT/SA
