MANILA, Philippines – Itinalaga ng Armed Forces of the Philippines (AFP) si Vice Admiral Alan Javier bilang bagong commander ng Palawan-based Western Command (Wescom), ang yunit na nangangasiwa sa depensa ng estratehikong karagatan ng West Philippine Sea.
Pinangunahan ni AFP chief Gen. Romeo Brawner Jr. ang change-of-command ceremony noong Linggo sa Antonio Bautista Air Base sa Puerto Princesa City, Palawan.
Pinalitan ni Javier si Commodore Charles Merric Villanueva, na nagsilbing acting commander matapos ang pagreretiro ni Vice Adm. Alfonso Torres Jr. noong Pebrero 16. Mananatili si Villanueva bilang Wescom deputy commander for external defense operations.
Ayon sa AFP, isinagawa rin sa seremonya ang simbolikong turnover of command at pagkilala sa pamumuno ni Villanueva.
Sinabi ni Brawner na sa panahon ni Villanueva ay napanatili ang kapani-paniwala at matatag na presensya ng Wescom sa West Philippine Sea.
“Maritime and sovereignty patrols were carried out with discipline and purpose. Our domain awareness improved. Our posture remained firm—without escalation, without compromise. The work you have done has strengthened our position, not just operationally but institutionally,” ani Brawner.
Hinimok din niya si Javier na ipagpatuloy ang pagpapalakas sa operasyon ng yunit.
“To Vice Admiral Alan Javier, you come into this role with experience that is both operational and strategic. Your task is clear: sustain presence, strengthen deterrence, build capability, and lead your people well,” dagdag niya.
Samantala, mananatili si Rear Adm. Roy Vincent Trinidad bilang spokesperson ng Philippine Navy at AFP para sa West Philippine Sea sa kabila ng kanyang mandatory retirement matapos mag-57 taong gulang noong Abril 23.
Ayon sa Philippine Navy, magpapatuloy si Trinidad bilang naval reservist dahil sa kahalagahan ng kanyang papel sa pagpapaliwanag ng posisyon ng militar sa mga usaping pandagat. Dave Baluyot
