MANILA, Philippines – Iginiit ni House Senior Deputy Minority Leader at Mamamayang Liberal Party-list Rep. Leila de Lima na hindi lumabag sa bank secrecy law o anumang batas ang pagdinig ng House committee on justice kaugnay sa “suspicious and covered” financial transactions ni Vice President Sara Duterte.
Ito ay matapos ihayag ng asawa ni Duterte na si abogado Manases “Mans” Carpio na magsasampa siya ng reklamong kriminal laban sa mga opisyal ng Bangko Sentral ng Pilipinas (BSP), Anti-Money Laundering Council (AMLC), at mga miyembro ng House justice committee dahil sa umano’y paglabag sa Anti-Money Laundering Act, bank secrecy laws, at Data Privacy Act.
Sinabi ni De Lima na karapatan ni Carpio ang magsampa ng kaso, ngunit nanindigan siyang walang nilabag na batas ang komite.
“But, as far as the House Committee on Justice is concerned, the proceedings cannot be considered violative of any law. Cases of impeachment, being sui generis, are not covered by the prohibition under the Secrecy of Bank Deposits Law,” ani De Lima.
Ipinaliwanag niya na tinutukoy ng panel ang probable cause sa mga validly initiated impeachment complaints at AMLC records ng umano’y suspicious at covered transactions ang ipinatawag, hindi ang bank accounts.
Dagdag niya, sa ilalim ng Republic Act 9160 o Anti-Money Laundering Act, obligadong ireport ng mga bangko sa AMLC ang kahina-hinalang transaksyon at hindi ito paglabag sa Republic Act 1405 o Secrecy of Bank Deposits Law.
“Also, the prohibition on disclosure applies only to officers and employees of banks and banking institutions,” saad niya.
“The fact that evidence of ill-gotten wealth was exposed in the course of the impeachment proceedings does not make such exposure criminal. It is a direct consequence of impeachment as an accountability mechanism,” dagdag pa niya.
Sa pagdinig noong nakaraang linggo, sinabi ng AMLC na hindi bababa sa 18 transaksyon na inuugnay kay Duterte at sa kanyang pamilya ang tumugma sa covered at suspicious transaction reports.
Iniulat din ng AMLC na si Duterte ay paksa ng 27 suspicious transaction reports mula Agosto 2024 hanggang Enero 2026 na may kaugnayan umano sa drug trafficking, graft and corruption, at malversation.
Dagdag pa nito, may P6.7 bilyong “covered and suspicious transactions” na nakapangalan kina Duterte at Carpio mula 2006 hanggang 2025.
Samantala, hinimok ni House human rights chair at Manila 6th District Rep. Bienvenido “Benny” Abante Jr. si Duterte na personal na dumalo sa pagdinig sa Abril 29.
“Sa akin naman, sinabi ko, it is better for the Vice President to attend, take an oath and answer all the allegations, instead of going to the media. Sapagka’t sa amin naman, kung wala ka namang itinatago, bakit ka matatakot mag-appear, ‘di ba?” ani Abante.
Sinabi naman ni House public accounts chair at Bicol Saro Rep. Terry Ridon na kailangan ng 21 boto mula sa 39 miyembro upang mairekomenda ang impeachment at maiakyat ito sa plenaryo bago posibleng maipadala sa Senado para sa paglilitis. RNT
