MANILA, Philippines – Inanunsyo ng Anti-Money Laundering Council (AMLC) nitong Biyernes, Oktubre 10 na nakakuha na ito ng ikaanim na freeze order mula sa Court of Appeals (CA) sa asssts ng ilang indibidwal at kompanya na iniimbestigahan kaugnay sa maanomalyang flood control projects.
Sa pahayag, sinabi ng AMLC na nakakuha ito ng pinakabagong freeze order nitong Oktubre 10, 2025 na inilarawan bilang marka ng isang “significant step forward in its investigation into alleged irregularities in flood control infrastructure projects.”
Sakop ng freeze order ang 39 bank accounts, apat na insurance policies, at 59 real estate properties, kabilang ang residential, commercial, at agricultural assets.
Tinukoy din ng AMLC na ang pinakabagong frozen properties ay may kaugnayan sa dating mataas na opisyal ng pamahalaan na pinaghihinalaang may malaking ambag sa procurement process ng mga kwestyonableng flood control contracts.
Nagdala ang pinakabagong freeze order sa kabuuang frozen assets na P4.67 bilyon at inaasahang tataas pa.
Sa ngayon ay nasa 1,671 na ang frozen bank accounts, 58 insurance policies, 163 motor vehicles, 99 real properties, at 12 e-wallet accounts.
“We are taking deliberate actions to preserve assets potentially linked to unlawful activity,” ayon kay AMLC Executive Director Matthew David.
“Our focus remains on ensuring that public funds are protected and that those involved are held accountable through lawful and transparent processes,” sinabi pa ni David.
Nakikipagtulungan ang AMLC sa Independent Commission for Infrastructure, Office of the Ombudsman, Bureau of Internal Revenue, at National Bureau of Investigation. RNT/JGC
