MANILA, Philippines – Napiga ni Senator-judge Raffy Tulfo ang isang mataas na opisyal ng Anti-Money Laundering Council (AMLC) hinggil sa P319 milyong remittances na pumasok sa bank account ng kompanyang pag-aaari ng asawa ni Vice President Sara Duterte, si Atty. Maneses Carpio.
Sa kanyang interjection, tinanong ni Tulfo si AMLC Secretariat Executive Director Ronel Buenaventura hinggil sa dami ng foreign remittances mulang China at iba pang Chinese entities patungo sa Cale88 Foods Corporation, base sa covered transaction reports (CTRs) and suspicious transaction reports (STRs).
“Regarding foreign remittances received by Cale88 from China, based on the CTRs and STRs… in this account, how much in total have we identified as coming from China or Chinese entities?” tanong ni Tulfo sa ika- 34 araw ng impeachment trial ni Duterte nitong Martes, October 6, 2026.
Sa kanyang tugon, sinabi ni Buenaventura na sinasabi ng AMLC records at tabular summaries na nagpapakita ng foreign remittances mulang China patungo sa Cale88 na nagkakahalagang ₱319,326,770.41.
Katulad ito ng mga alegasyon ni dating Sen. Antonio Trillanes IV sa press conference noong Biyernes, matapos alisin si Trillanes bilang prosecution witness.
Lumitaw ang pagtatanong ni Tulfo sa paglilitis habang sinusuri ang financial records at suspicious transaction reports na kinasasangkutan ng Cale88, isang kampanya na pag-aari ni Carpio, asawa ni VP Duterte.
Binuksan ng Senate impeachment court nitong Lunes ang records para sa P4.4 bilyong financial trail na kinasasangkutan nina Duterte at ng asawa nitong si Atty. Carpio.
Isinagawa ito ng impeachment court matapos ibasura ang mosyon ng depensa na harangin ang pagtestigo ni Buenaventura hinggil sa records na isinumite ng bangko at iba pang covered institutions.
Sa Day 33 ng paglilitis, sinabi ni Buenaventura na ang P4.4 bilyon ay kabuuang halaga ng mga transaksyon na nakapaloob sa 666 covered transaction reports o CTRs at 55 suspicious transaction reports o STRs nina Duterte at Carpio.
Nilinaw niyang aggregate value ito ng mga ulat at hindi hiwalay na halaga bukod sa mga partikular na transaksyong binanggit sa korte.
Naunang, ibinasura ni presiding officer Sen. Francis “Chiz” Escudero ang argumento ng depensa na protektado ng “absolute confidentiality” ang mga ulat ng AMLC, kaya pinayagan ang pagtestigo ni Buenaventura.
“The court agrees that Section 8-A [of the Anti-Money Laundering Act] must be considered. However, it does not follow that AMLC reports have thereby become absolutely immune from compulsory process,” sabi ni Escudero.
“The provision therefore regulates the manner and conditions of disclosure. It does not command absolute silence under every circumstance,” dagdag niya.
“The AMLC is not a passive repository, and confidentiality cannot be invoked in a manner that defeats its statutory mandate,” ayon pa sa presiding officer. Ernie Reyes
