DUMANAS na (naman) ng ‘harassment’ ang mga kapatid nating mamamahayag sa Mindoro, PTFoMS Usec. Joe Torres.
Sa sinumpaang salaysay nina Jonathan Atuel (TMT), Joe Laurente (Dateline MIMAROPA), Roberto Evora at Rey Jandusay (DWAR), naganap ang insidente noong Nobyembre 13, nang magpunta sila sa Bongabong Municipal Hall, upang “sumaksi” sa isang ‘public bidding’ para sa isang ‘farm-to-market road project’ na “tatagos” sa dalawang sityo sa Bgy. Hagan.
Tinatayang aabot sa P210 milyon ang pondo na “nilakad” ng Phil. Rural Development Program sa World Bank.
Anang grupo, “naaktuhan” nila si Mayor Elegio Malaluan na pilit (daw) “inaagaw” ang dalang dokumento ng isang babae na gusto yatang sumali sa ‘bidding.’ Kung bakit parang “ayaw” ni Yorme na makasali siya sa bidding, eh, bakit nga ba, Mayor?
Sa reklamo, sinabi pa (daw) ni Mayor na “hindi” sila pwedeng ‘mag-cover’ ng nasabing bidding at huwag din umano silang magkamali na kumuha ng bidyo at litrato dahil “mabiglain” pala si Yorme eh, baka “masuntok” pa sila at “kuyugin” ng kanyang mga aso, ehek, tauhan, aguy!
Sa bidding naman mismo, hindi ipinakita ni BAC Greg Reyes ang alok ng bawat bidder hanggang matapos ang proseso.
Ganyan pala ang ‘public bidding’ sa Bongabong, Gov. Bonz Dolor? “Bawal” ang midya at “itinatago” ang resulta? Eh, “sino” kaya ang nanalo? Si Mayor siguro… ang dapat tanungin, hehehe.
Ano nga kayang “meron” sa nasabing bidding at tila ‘allergic’ si Mayor na malaman ng publiko ang resulta? Aber, kahit si Christian Vargas ng PRDP, hindi na “pumiyok” sa kanyang mga nakita, eh, bakit?
Bukas ang pitak na ito sa paliwanag mo, Yorme.
Abangan!
