MANILA, Philippines – Sinabi ni Dagupan Archbishop Socrates Villegas na maaaring ituring na pagsupil sa katotohanan na aniya ay isang kasalanan ang pagpapaliban sa impeachment trial ni Vice President Sara Duterte.
Si Villegas na dating namuno sa Catholic Bishops Conference of the Philippines ay sinabi na ang bansa ay may karapatan sa katotohanan na maaari lamang itatag sa pamamagitan ng batas at ebidensya.
Idinagdag ng Arsobispo na ang pagpapaliban ay isang anyo ng katamaran na humahantong sa pagpapabaya sa mga responsibilidad, gawain o pagkakataon na maaaring bigyang-kahulugan bilang kakulangan ng kasipagan o pangako.
Nitong Lunes, sinabi ni Senate President Francisco “Chiz” Escudero na hindi siya makikinig sa mga nagmamadali na simulan ang impeachment trial.
Ang articles of impeachment ay dapat sanang babasahin sa Senado noong Hunyo 2 ngunit inilipat ito ni Escudero sa Hunyo 11, ang huling sesyon ng 19th Congress bago ito mag-adjourn. Jocelyn Tabangcura-Domenden
