MANILA, Philippines – Magdadala pa rin ng maulap na kalangitan at mga pag-ulan ang Tropical Depression Ada kahit ito ay humina na, ayon sa Philippine Atmospheric, Geophysical and Astronomical Services Administration (PAGASA) nitong Lunes.
Sa kanilang 5 a.m. bulletin, sinabi ng PAGASA na ang sentro ng Ada ay namataan sa layong 380 kilometro silangan ng Casiguran, Aurora bandang 4 a.m.
Taglay nito ang lakas ng hanging aabot sa 55 km/h malapit sa sentro at bugso na hanggang 70 km/h, at kumikilos pahilagang hilagang-silangan sa bilis na 10 km/h. Wala nang nakataas na wind signal matapos itong humina bilang tropical depression bandang 2 a.m.
Ayon sa PAGASA, ang trough ng Ada ay magdudulot ng maulap na kalangitan na may kalat-kalat na pag-ulan at pagkidlat-pagkulog sa Bicol Region, Aurora, Quezon, at Northern Samar, na maaaring magdulot ng flash flood o landslide dahil sa katamtaman hanggang sa minsang malakas na ulan. Apektado rin ng Northeast Monsoon ang Hilagang Luzon.
Inaasahang kikilos pa-hilagang-silangan ang Ada bago sundan ang paikot na galaw sa karagatan sa silangan ng Luzon.
“Continuous dry air entrainment from the northeast monsoon is expected to result in gradual weakening of Ada. It may be downgraded into a low pressure area by Wednesday (21 January), although earlier weakening remains possible,” ayon sa PAGASA.
Makakaranas ng maulap na kalangitan na may bahagyang pag-ulan ang Cordillera Administrative Region at Cagayan Valley, habang inaasahan ang bahagyang maulap hanggang maulap na panahon na may panaka-nakang mahina ang ulan sa Ilocos Region.
Sa Metro Manila at iba pang bahagi ng bansa, inaasahan ang bahagyang maulap hanggang maulap na kalangitan na may panaka-nakang pag-ulan o thunderstorms.
Katamtaman hanggang malakas na hangin at katamtaman hanggang maalong dagat ang mararanasan sa hilaga at silangang bahagi ng Luzon at silangang Visayas, habang magaan hanggang katamtaman ang hangin at bahagya hanggang katamtaman ang alon sa iba pang bahagi ng bansa. RNT
