MANILA, Philippines — Nanawagan si Interior Secretary Jonvic Remulla sa Kongreso na higpitan ang mga batas sa baril, kabilang ang muling paggawa sa illegal possession of loose firearms bilang non-bailable offense at pagpapataw ng mas mabigat na pananagutan sa mga gun owner kapag nagamit ng iba ang kanilang armas sa krimen.
Ginawa ni Remulla ang panawagan kasunod ng pamamaril sa Ateneo de Zamboanga University noong Agosto 18, kung saan gumamit ang isang junior high school student ng mga baril na pag-aari o nakatalaga sa kanyang ama. Kinumpirma ng mga awtoridad na kabilang sa mga nakuhang armas ang isang .40-caliber pistol na government-issued.
“Ang hinihingi ko sa Congress, i-repeal na ang Robin Padilla Law at gawin ulit non-bailable ang loose firearms,” pahayag ni Remulla sa press briefing nitong Miyerkules.
Ang tinutukoy ni Remulla na “Robin Padilla Law” ay impormal na tawag sa Republic Act No. 8294, isang batas noong 1997 na nag-amyenda sa mga parusa kaugnay ng illegal possession of firearms. Hindi ito opisyal na pangalan ng naturang batas.
Iginiit din ni Remulla na dapat magkaroon ng karagdagang pananagutan ang legal na may-ari ng baril kapag napunta ito sa kamay ng menor de edad o ibang tao at nagamit sa krimen.
“Isn’t the owner of the gun equally responsible?” ani Remulla, kasabay ng panawagang magkaroon ng accessory penalty laban sa mga gun owner sa ganitong mga kaso.
Ayon pa sa kalihim, 98% umano ng gun-related crimes sa bansa ay gumagamit ng loose firearms, dahilan upang hilingin niyang paigtingin ang kampanya laban sa mga ilegal na armas. Ang naturang porsiyento ay pahayag ni Remulla at hindi inilatag sa press briefing ang buong dataset na pinagmulan nito.
Sa ilalim ng kasalukuyang Republic Act No. 10591 o Comprehensive Firearms and Ammunition Regulation Act, may magkakaibang parusa para sa unlawful acquisition o possession ng firearms depende sa uri at kalagayan ng armas. Nakasaad din sa batas na maaaring bawiin o suspendihin ang firearm license kapag nawala ang baril dahil sa negligence.
Samantala, ang Republic Act No. 11766, na nabanggit sa ilang ulat kaugnay ng isyu, ay pangunahing nag-amyenda sa validity period ng firearm licenses, registrations at permits to carry at hindi ang batas na tinatawag ni Remulla na “Robin Padilla Law.”
Patuloy namang iniimbestigahan ng mga awtoridad kung paano nakuha ng estudyante ang mga baril at kung paano niya naipasok ang mga ito sa loob ng campus. Dave Baluyot
