MANILA, Philippines- Pinaigting ng bansa ang pagsisikap na labanan ang paggamit ng mga pekeng dokumento sa paglalakbay kasabay ng inilabas na babala ng mga awtoridad na ang mga sindikato ng trafficking ay nagiging sopistikado sa kanilang mga operasyon sa mga hangganan ng Pilipinas.
Naglabas ng abiso ang Commission on Filipinos Overseas (CFO) kasunod ng mga ulat ng mga biyahero na gumagamit ng mga pekeng CFO certificate, pekeng kontrata sa pagtatrabaho, at pekeng mga permit sa pagtatrabaho sa ibang bansa.
Ayon sa Bureau of Immigration (BI), ang mga kamakailang kaso na naharang ng mga awtoridad sa imigrasyon ay kinabibilangan ng mga grupong nagpapanggap bilang mga misyonerong simbahan na kalaunan ay nagbunyag na na-recruit para sa mga ilegal na trabaho sa ibang bansa.
Kaugnay nito, binigyang-diin ni Immigration Commissioner Joel Anthony Viado na pinaigting ng bureau ang mga inspeksyon sa hangganan sa mga pangunahing paliparan at daungan.
Pinaigting ng BI ang mga hakbang laban sa human trafficking kung saan binigyang-diin na ang mga kasong ito ay nagbibigay-diin sa agad na pangangailangan para sa patuloy na pagsusumikap ng modernisasyon ng ahensya.
“Modernizing the systems of the BI has always been my drive. We are operating on an 85-year-old law, and our technologies are almost outdated,” ani Viado.
Nagde-deploy din ang BI ng mas maraming tauhan sa mga pangunahing paliparan habang pinalalawak nito ang paggamit ng mga biometric system at nakikipagtulungan sa CFO, Department of Foreign Affairs, at mga ahensyang nagpapatupad ng batas upang matukoy ang mga pekeng papeles bago umalis ng bansa ang mga biyahero. JR Reyes
