MANILA, Philippines – Nasa Pilipinas pa rin si dating police Lt. Col. Rafael Dumlao III, ang umano’y utak sa pagdukot at pagpatay sa Korean businessman na si Jee Ick-joo.
“He is in the country. His last travel was in 2024. [He] left with a court-issued departure order and came back a few days after,” mensahe ni BI spokesperson Dana Sandoval.
Aniya, subject sa Hold Departure Order si Dumlao at kasama sa immigration lookout bulletin order (Ilbo).
Hindi mapipigilan ng Ilbo ang isang indibidwal na makabiyahe at paraan lamang ng immigration officers na mamonitor ang pag-alis nito.
Sa kabila nito, ang court-issued HDO ay maaaring gamitin upang mapigilan ang mga suspek o indibidwal na may kasong kriminal na makaalis ng bansa.
“If we encounter him at any BI-manned port, we will inform the concerned authorities,”
ani Sandoval.
Ipinaliwanag ni Sandoval na ang arrest warrants ay ipinatutupad ng law enforcement authorities, kung kaya’t sa oras na makasalamuha ng immigration personnel si Dumlao ay magsasabi ito sa mga ahensyang dapat magpatupad ng kautusan.
Kasunod ng pagpupulong ng mga opisyal ng South Korean embassy at Korean communities in the Philippines, ipinag-utos ni Executive Secretary Lucas Bersamin na tuntunin at arestuhin si Dumlao na itinuturing na mastermind sa 2016 kidnap-and-slay case. RNT/JGC
