MANILA, Philippines – Naghain ng motion for reconsideration si Bohol Governor Erico Aristotle Aumentado na humahamon sa six-month preventive suspension ng Ombudsman sa kaugnayan umano nito sa kontrobersyal na resort sa Chocolate Hills protected area sa Bohol.
“I am genuinely surprised by this preventive suspension order. I categorically deny any involvement in the approval of the construction, operation, and expansion of Captain’s Peak Resort. These charges are baseless and lack any factual foundation,” pahayag ni Aumentado sa mosyon na inihain niya nitong Martes, Hunyo 11.
Itinanggi ni Aumentado na nagkaroon siya ng kaugnayan sa konstruksyon ng resort sa Sagbayan, at sinabing itinayo ito noong 2018 nang siya ay representative pa ng second district ng probinsya sa Kongreso.
Hini rin umano siya naimbitahan sa pagpupulong ng Protected Area Management Board (PAMB) na ginanap noong Hulyo 2022, kung saan inaprubahan ang resolusyon na nag-eendorso sa pagtatayo ng naturang resort.
Matatandaan na inilagay ng Ombudsman si Aumentado at 68 iba pa sa preventive suspension sa loob ng anim na buwan sa nagpapatuloy na imbestigasyon ng mga istruktura sa Chocolate Hills.
Ang mga opisyal ay inilagay sa “preventive suspension until the administrative adjudication of this case is terminated, but not to exceed six months without pay.” RNT/JGC
