Bong Go naghatid ng tulong sa mga nasunugan sa Maynila

MANILA, Philippines- Personal na nagbigay ng karagdagang tulong si Senator Christopher “Bong” Go sa mga biktima ng sunog kamakailan sa Barangay 330, Sta. Cruz, Maynila.

Nangako ang senador na patuloy na tutulong sa mga nasunugan para mapabilis ang kanilang pagrekober.

Idinaos sa Antonio Regidor Elementary School, ang mga apektadong pamilya ay tumanggap ng grocery packs, lalagyan ng tubig, meryenda, bitamina, mask, kamiseta, at bola para sa basketball at volleyball mula kay Go at sa kanyang Malasakit Team. 

Nakatanggap ang mga piling benepisyaryo ng sapatos, relo, bisikleta, at mobile phone.

Samantala, ang National Housing Authority ay nagbigay ng tulong sa pabahay sa mga biktima sa pamamagitan ng Emergency Housing Assistance Program (EHAP). Ito ay upang matulungan silang bumili ng mga mahahalagang materyales tulad ng mga pako at mga yero sa bubong upang muling makapagtayo ng kanilang mga tahanan. 

Si Go ay aktibong sumuporta at patuloy na nagsusulong ng  programang ito upang matiyak ang pagbangon mula sa mga trahedya ng mga nasunugan.

“Mahirap pong masunugan. Masakit masunugan. Tinatanong ko una, mayroon bang nasaktan o namatay? Dahil tandaan po natin ang gamit po nabibili. Ang damit po nalalabhan. Ang pera po’y kikitain. Pero ang perang kikitain ay hindi nabibili ang buhay. Pasalamat tayo buhay po tayo at magtulungan lang po tayo,” hikayat ni Go.

Kinikilala ang mas malawak na mga isyu na nag-aambag sa kawalan ng tirahan, tulad ng mga natural na sakuna, kahirapan, kawalan ng trabaho, at kakulangan ng abot-kayang pabahay, inihain ni Go ang Senate Bill No. 192 na nagmumungkahi ng Rental Housing Subsidy Program upang suportahan ang mga biktima ng kalamidad.

Magpapadali ito sa kanilang pag-access sa abot-kayang upa sa pamamagitan ng tulong sa pag-upa ng gobyerno.

Sa ilalim ng panukala, bubuo ng isang programa sa pabahay upang mabigyan ang mga biktima ng kalamidad ng mas abot-kayang pag-access sa mga subsidyo sa pagpapaupa na ibinibigay ng pamahalaan kung ito ay maisasabatas.

“Importante po meron silang komportableng matirhan muna. May mga anak rin po itong mga nasunugan, mga nabahaan, eh wala silang komportableng higaan,” sabi ni Go.

“Minsan po napapansin ko, gumagawa na lang sila ng temporary tent sa tabi ng kalye. Kawawa po ‘yung ating mga kababayan. Tulungan po natin ‘yung mga mahihirap nating kababayan para maiwasang maging squatter sa sariling bayan,” dagdag niya.

Pinasalamatan ni Go ang mga lokal na pinuno tulad nina Congressman Joel Chua, Mayor Honey Lacuña, at Vice Mayor Yul Servo Nieto para sa kanilang walang patid na suporta sa panahon ng krisis sa kanilang nasasakupan. RNT