Bong Go umayuda sa TODA sa Pampanga

MANILA, Philippines – Personal na nagpaabot ng karagdagang suporta si Senador Christopher “Bong” Go sa mahigit isang libong naghihirap na miyembro ng Tricycle Operators and Drivers’ Associations (TODA) sa Candaba, Pampanga.

Ang inisyatiba na ito, na ginanap sa Candaba Municipal Covered Court, ay nagbibigay-diin sa hindi natitinag na pangako ng senador sa pag-angat ng mga mahihinang sektor.

May kabuuang 1,673 benepisyaryo ang nakatanggap ng karagdagang suporta gaya ng meryenda, kamiseta, bola ng basketball at volleyball, mula mismo kay Senator Go.

Nakatanggap din ang ilan ng mga espesyal na item tulad ng sapatos, bisikleta, mobile phone, at relo.

Sa pamamagitan ng pagtutulungan nina Senator Go at ng lokal na pamahalaan ng Candaba sa pangunguna ni Mayor Rene Maglanque, ang bawat kwalipikadong benepisyaryo ay nakatanggap ng suportang pinansyal upang higit na matugunan ang kanilang mga agarang pangangailangan.

Isinagawa rin ang pagtitipon sa suporta ng iba pang opisyal tulad nina Pampanga Governor Dennis Pineda, Board Member Kaye Naguit, Apalit Mayor Jun Tentangco, Candaba Councilors Thelma Macapagal, Jai Bondoc, Quinnie Culala, at Rami Maglanque, at dating Konsehal Donya Salac, at iba pa.

Bilang chairperson ng Senate committee on health and demography, sinamantala ni Senator Go ang pagkakataong hikayatin ang mga may problema sa kalusugan na i-avail ang tulong medikal mula sa malalapit na Malasakit Centers.

Ang mga Malasakit Center na matatagpuan sa Jose Lingad Memorial Regional Hospital at Overseas Filipino Workers Hospital sa San Fernando City, Jose B. Rafael Lazatin Memorial Medical Center sa Angeles City, at Diosdado Macapagal Memorial Hospital sa Guagua, ay nagbibigay ng tulong upang mabayaran ang mga gastusin ng mahihirap na pasyente.

Ang Malasakit Centers Act ay pangunahing isinulat at itinaguyod ni Senator Go noong 2019.

Sa ngayon, nakinabang na rito ang mahigit 15 milyong Pilipino na may 166 Malasakit Centers na nakakalat sa buong bansa.

Sinuportahan din ni Senator Go, na nagsisilbi ring vice chairperson ng Senate committee on finance, ang iba’t ibang development projects sa Candaba. Kabilang dito ang pagpapatayo ng dalawang palapag na multi-purpose building at ang pagkonkreto ng kalsada sa Barangay Pulong.

Noong araw ding iyon, nakipag-ugnayan din si Senator Go at nagbigay ng suporta sa iba’t ibang kooperatiba sa San Fernando City.

“Noon pa man, hangarin ko na kahit saang sulok kayo ng Pilipinas, basta kaya ng aking katawan at panahon, sunog, putok ng bulkan, lindol, bagyo, pupuntahan po namin kayo. Makatulong sa abot ng aming makakaya, makapagbigay ng solusyon sa mga problema, makapag-iwan ng kaunting ngiti sa panahon ng inyong pagdadalamhati,” ani Go. RNT