MANILA, Philippines – Ibinalik nitong Lunes sa kustodiya ng Senado si dating Department of Public Works and Highways Bulacan assistant engineer Brice Hernandez mula sa Pasay City Jail, ayon sa Office of the Senate President.
Dumating siya bandang 10:10 a.m. matapos sumailalim sa medical exam.
Inilipat si Hernandez matapos magsampa ang kanyang kampo ng writ of amparo sa Pasay Regional Trial Court para humingi ng proteksyon at maisama sa witness protection program.
“The Writ of Amparo was filed to secure his protection and ensure his freedom from threat and harm,” ayon sa kanyang abogado na si Ernest Levanza, na tinawag itong “positive and favorable development.”
Si Hernandez, na una nang idineklarang in contempt sa ilalim ni dating Blue Ribbon chair Sen. Rodante Marcoleta, ay nagbunyag ng umano’y pagkakasangkot ng ilang senador sa iregular na flood control projects. Ilang beses siyang inilipat ng kulungan — mula Senado, PNP Custodial Center, hanggang Pasay City Jail — dahil sa mga debate ukol sa kanyang detensyon.
Humiling ang kanyang kampo ng pagbabalik sa Senado, na may “renewed faith” sa pamumuno ni Senate President Vicente Sotto III at Blue Ribbon chair Sen. Panfilo Lacson.
Pinayagan ito ni Sotto at kinilala ng korte.
Inaasahang haharap si Hernandez sa susunod na pagdinig ng Blue Ribbon committee.
Samantala, ikinatuwa ni Senator Rodante Marcoleta ang pagbalik kay Hernandez sa kustodiya ng Senado.
