MANILA, Philippines – Bumisita si Kalihim Hans Leo Cacdac sa pamilya ni Gerome Zarate De Castro, isang OFW na namatay sa Cyprus, at tiniyak ang tulong pinansiyal, pang-edukasyon, pangkabuhayan, at legal. Nangako rin siyang tutukan ang tunay na sanhi ng pagkamatay.
Natagpuan si De Castro, na nagtrabaho ng tatlong taon sa City of Dreams Cyprus, na malubhang nasugatan sa labas ng kanyang apartment sa Limassol noong Setyembre 28 at pumanaw sa ospital.
Bagamat iniulat bilang pagkahulog mula sa balkonahe, ipinakita ng forensic findings na namatay siya dahil sa haemorrhagic shock mula sa internal bleeding at sugat sa tiyan, na hindi tugma sa simpleng pagkahulog. Ang kaso ay muling inuri bilang premeditated murder.
Na-repatriate ang labi ni De Castro noong Oktubre 29, at nakatanggap ang pamilya ng PHP200,000 accidental death benefit at tulong para sa anak sa ilalim ng OWWA Educational Livelihood Assistance Program.
Patuloy na nakikipag-ugnayan si Cacdac sa Department of Foreign Affairs para sa final autopsy results. Dave Baluyot
