MANILA, Philippines – Isasara sa mga motorista ang ilang bahagi ng Roxas Boulevard tuwing Linggo, simula Mayo 26.
Nilagdaan na ni Manila Mayor Honey Lacuna ang Ordinansa Blg. 9074, o ang Move Manila Program, upang bigyan ang mga residente at bisita ng mas malawak na espasyo para sa paglalakad, pag-jogging, pagbibisikleta, pagtakbo, at iba pang uri ng ehersisyo.
Sa ilalim ng bagong ordinansa ng lungsod, ang mga kalsada sa hilaga at timog-silangan ng Roxas Boulevard—mula Padre Burgos Circle hanggang Quirino Avenue—ay isasara sa mga sasakyan mula 5 a.m. hanggang 9 a.m. tuwing Linggo. Sa lugar na ito, ang mga residente at bisita ay maaaring gumawa ng mga pisikal na aktibidad.
“Ang pagpapatupad [ng car-free Sunday] sa Roxas Boulevard ay magbibigay ng panibagong pananaw sa nakasanayan nating pangunahing kalsadang punong-puno ng mga sasakyan,” ani Lacuna sa Facebook post nito.
Bukod sa mga benepisyong pangkalusugan, inaasahan din ng ordinansa na mabawasan ang polusyon sa kahabaan ng kalsada ng Maynila. RNT
