MANILA, Philippines – Nag-isyu ng tatlong radio challenge ang China laban sa isang Philippine Coast Guard (PCG) aircraft na papalapit sa Pag-asa Island sa West Philippine Sea (WPS).
Ayon sa ulat, sakay ng eroplano ang mga matataas na opisyal ng PCG ngunit ipinagpatuloy pa rin ang kanilang scheduled flight at ligtas na nakalapag sa isla.
Sinabi ni PCG spokesperson for the WPS Rear Admiral Jay Tarriela, “They challenged us, we challenged them back,” bilang tugon sa insidente.
Ayon sa ulat, ito ay panibago lamang sa serye ng radio exchanges sa pagitan ng Pilipinas at China sa pinag-aagawang bahagi ng WPS.
Patuloy ang tensyon sa rehiyon, kung saan inaangkin ng China ang halos buong South China Sea, kabilang ang mga bahagi na inaangkin din ng Pilipinas at iba pang bansa gaya ng Vietnam, Malaysia, Indonesia, at Brunei.
Ang West Philippine Sea ay tumutukoy sa mga karagatang nasa kanlurang bahagi ng Pilipinas, kabilang ang Luzon Sea at mga katubigang nakapalibot sa Kalayaan Island Group at Bajo de Masinloc.
Noong 2016, pinaboran ng Permanent Court of Arbitration sa The Hague ang Pilipinas at sinabing walang legal na basehan ang malawak na pag-angkin ng China, ngunit hindi ito kinikilala ng Beijing. RNT/MND
