MANILA, Philippines- Mababakante ang pwesto ni Senador Sonny Angara sa Senado hanggang sa mapunan ito pagkatapos ng 2025 midterm elections, sinabi ng Commission on Elections (Comelec) nitong Martes, matapos ihayag ng Malacañang na si Angara ang susunod na Education secretary.
“Unless there is a call from the Senate to call for a special election, the Senate seat will remain vacant,” sabi ni Comelec chairman George Garcia.
Bago ang anunsyo ng Malacañang, sinabi ni Senate President Francis “Chiz” Escudero na mananatiling bakante ang pwesto ni Angara sakaling mapili si Angara na maging susunod na kalihim ng Department of Education (DepEd).
Sinabi ng Presidential Communications Office (PCO) sa Facebook post nitong Martes na napili ni Pangulong Ferdinand “Bongbong” Marcos Jr. si Angara bilang susunod na DepEd secretary, kapalit ni Vice President Sara Duterte na nagbitiw sa kanyang posisyon.
“Senator Angara has an extensive legislative history, having championed significant educational reforms since joining the Senate of the Philippines in 2013,” sabi ng PCO.
“His notable legislative achievements include the Universal Access to Quality Tertiary Education Act and the Enhanced Basic Education Act of 2013 (K-12).”
Si Angara ay nasa kanyang ikalawang sunod at huling anim na taong termino bilang senador. Jocelyn Tabangcura-Domenden
