MANILA, Philippines – Itinaas ni Pangulong Ferdinand R. Marcos Jr. ang pang-araw-araw na subsistence allowance ng mga opisyal at enlisted personnel ng Armed Forces of the Philippines (AFP) mula PHP150 hanggang PHP350. Ang PHP200 na dagdag, sa ilalim ng Executive Order (EO) 84 na nilagdaan noong Marso 14, ay magkakabisa simula Enero 1, 2025.
Kinilala ng EO 84 ang pangangailangang suportahan ang kapakanan ng mga sundalo bilang pagtanaw sa kanilang sakripisyo sa pagtatanggol sa soberanya ng bansa. Huling nadagdagan ang allowance noong 2015.
Saklaw ng pagtaas na ito ang mga aktibong sundalo, trainees, reservists, at military cadets. Kukunin ang pondo mula sa 2025 budget ng AFP at iba pang mapagkukunan na itatalaga ng Department of Budget and Management. Isasama rin ng AFP ang pondong ito sa kanilang mga susunod na panukalang badyet. Magkakabisa ang EO 84 agad pagkatapos ng paglalathala. RNT
