MANILA, Philippines – Nakapagtala na ang Pilipinas ng mga kaso ng streptococcal toxic shock syndrome (STSS), isang nakamamatay na bacterial infection na kasalukuyang tumataas sa Japan, sinabi ni infectious diseases expert Dr. Rontgene Solante nitong Huwebes, Hunyo 27.
Ayon kay Solante, ang STSS ay dulot ng common bacteria na nagdudulot ng pharyngitis o pamamaga ng pharynx. Sa kabila nito, nagdudulot ang bacteria na ito ng rare at severe na komplikasyon kapag kumalat sa daluyan ng dugo.
“Ito’y isang impeksyon na naguumpisa sa balat. ‘Yung mga may sugat tapos papasukan ‘to ng mikrobyo, pupunta sa dugo. ‘Pag pumunta na ‘yan sa dugo, systemic na ‘yan, buong katawan mo… Napaka-bangis nitong bacteria, ‘yung Group A Streptococcus Pyogenes,” pagbabahagi ni Solante sa panayam ng DZBB.
Sinabi ni Solante na may mataas na mortality rate na 30% ang STSS, nangangahulugan na maaaring mamatay ang infected person sa loob ng 24 oras matapos lumitaw ang mga sintomas nito.
Kabilang sa mga sintomas nito ay lagnat, masakit na katawan, panghihina, pagsusuka, at pangingitim ng sugat na kalaunan ay magdudulot ng low blood pressure at hirap sa paghinga.
Karaniwang naaapektuhan ng STSS ang mga may mahinang immune system, kabilang ang mga matatanda at maging ang mga may diabetes at chronic renal failure.
“Napakabilis ang kalat nito doon sa katawan na taong involved—ma-involve ‘yung puso, ma-involve ‘yung atay, ma-involve ‘yung lungs. So multi organ system and involvement nito,” dagdag ni Solante.
Batay sa clinical experience, sinabi ni Solante na may ilang kaso na ng STSS ang naitala sa Pilipinas.
Sa Japan, umabot na sa 900 hanggang 1,000 ang kaso nito.
“Meron na rin tayong nakikita dito sa Pilipinas. Pakunti kunti lang pero mabilis talaga ‘yan,” aniya.
Dahil dito ay inabisuhan niya ang vulnerable population na magsuot ng face mask at hugasan ng mabuti ang mga sugat. RNT/JGC
