MANILA, Philippines – Itinama ng prosecution witness at financial forensic analyst na si Atty. Alexander Cabrera si defense counsel Atty. Kristine Ferrer nitong Lunes matapos gamitin ng huli ang salitang “alleged” sa pagbanggit ng kanyang report tungkol sa mga negosyo ni Vice President Sara Duterte.
Sa pagpapatuloy ng impeachment trial, tinatanong ni Ferrer si Cabrera tungkol sa mga kumpanyang binanggit sa report nito bilang business interests ng bise presidente.
Nang sabihin ni Cabrera na nakalimutan ni Ferrer ang Metro Chow King Food Corporation at dalawa lang ang binanggit nito na Gencorp Industries Inc. at CALE88 Foods Corporation, sinagot ito ng abogada na “alleged” business interests lamang ang mga ito.
“Alleged interest in businesses. Now I’m just reading your report sir, so yeah, alleged interest in businesses. In computing—” sabi ni Ferrer.
“Wala pong nakalagay na alleged sa report ko po,” mabilis na pagtutol ni Cabrera.
Sinabi ni Ferrer na posisyon ng depensa na “mga paratang lamang” ang nasa financial report.
“Ah, that’s our position,” ani Ferrer.
“Sabi niyo po you’re reading my report po eh,” tugon ni Cabrera.
“Hindi, kanina po,” paglilinaw ni Ferrer.
Hindi dito natapos ang pagtutuwid ni Cabrera. Maya-maya, sinabi ni Ferrer na ang konklusyon ng report ay may “supposed fraud” dahil hindi itinuring ni Cabrera ang mga kumpanya bilang hiwalay na juridical entity mula kay Duterte.
“Based on your own assessment there was an alleged or supposed fraud that were perpetrated by the respondent using the separate juridical entities, sir that’s why you pierced the veil of corporate fiction,” sabi ni Ferrer.
“Hindi po siya supposed fraud, non-reporting po siya,” sagot ni Cabrera.
“In your case that is your findings, that is your opinion,” sagot muli ni Ferrer.
“Hindi po, meron po akong testigo eh,” dagdag ni Cabrera.
Unang humarap si Cabrera sa witness stand noong Biyernes para magpaliwanag tungkol sa report niya sa financial transactions ni Duterte.
Aniya, may “unusual banking behavior” si Duterte noong 2025. Kabilang dito ang:
P200,007.29 sa Ginza Inakaya Tokyo, Japan noong Marso 19, 2025;
· P93,750.00 at P205,392.00 sa Nike store sa Davao City mall noong Disyembre 27, 2025;
· P256,882.50 sa Nike store sa Kuala Lumpur, Malaysia;
· P62,900.95 at P65,877.64 sa Don Quijote sa Shibuya, Tokyo noong Disyembre 8, 2025;
· P111,109.24 sa Don Quijote sa Aichi, Japan noong Hulyo 20, 2025.
Ayon sa Table 25 ni Cabrera, umabot sa P239,887.83 ang kabuuang halaga ng mga “unusual” transactions.
Idinagdag din niya na hindi idineklara ni Duterte ang mga sumusunod na cash mula 2022 hanggang 2025: P60,214,776 noong 2022, P80,701,151 noong 2023, P23,169,077 noong 2024, at P43,611,929 noong 2025 — o kabuuang P207,696,933.
Sa isa pang table, sinabi ni Cabrera na umabot sa P817,874,867 ang kabuuang hindi idineklarang halaga mula 2022 hanggang 2025.
Ipinaliwanag niya na kinompara nila ang idineklarang cash sa SALN ni Duterte sa year-end balances ng mga bank account nina Duterte, Carpio, at kanilang joint accounts. Ernie Reyes
