MANILA, Philippines – Sinabi ni Interior Secretary Jonvic Remulla nitong Biyernes na ang mga tracker team ay naka-deploy para isilbi ang arrest warrant na inisyu ng Sandiganbayan laban sa nagbitiw na Ako Bicol Party-list Rep. Zaldy Co at 17 iba pa mula sa Department of Public Works and Highways at construction firm na Sunwest Corporation kaugnay sa umano’y maanomalyang mga proyektong pang-imprastraktura sa Oriental Mindoro.
“In anticipation of that naka tracker team na kami sa kanilang lahat. As we speak pinupuntahan na ng mga teams namin yung mga all those involved, all their homes, all their known addresses,” saad ni Remulla.
“We are always one step ahead. We anticipate what’s ahead… We have tracker teams since Tuesday,” dagdag niya.
Sinabi ni Remulla na kailangan nilang suriin ang video surveillance sa opisina ni Co, gayundin ang kanyang mga kilalang tirahan para malaman kung nasaan man siya sa Pilipinas.
“Otherwise, the court will have to apply for a red notice and cancellation of passport,” aniya.
Sinabi ni Acting Philippine National Police chief Lt. Gen. Jose Melencio Nartatez Jr. na mahigpit silang nakikipag-ugnayan sa Sandiganbayan at iba pang kinauukulang ahensya upang matiyak ang legal at maayos na pagpapatupad ng mga warrant na ito.
Tiniyak din niya sa publiko na mahigpit na susundin ang angkop na proseso, at ang mga indibidwal na sangkot ay bibigyan ng lahat ng karapatan na ginagarantiyahan sa ilalim ng batas.
“We call on the public to continue placing trust in our institutions as we carry out our duties with integrity, respect for the rule of law, and commitment to justice,” ayon kay Nartatez.
Noong Martes, nagsampa ng graft charges ang Office of the Ombudsman laban kay Co at ilang opisyal ng DPWH at Sunwest Corp. kaugnay ng PHP289-million flood control project sa Oriental Mindoro. RNT/MND
