ALINSUNOD sa direktiba ni Pangulong Ferdinand R. Marcos Jr., nakatakdang maghatid ang Department of Labor and Employment (DOLE)-CALABARZON ng agarang trabaho at tulong- pangkabuhayan sa mga komunidad sa rehiyon na naapektuhan ng mga nakaraang bagyo. Ipatutupad ng DOLE CALABARZON ang mga pangunahing inisyatiba nito upang tulungan ang libo-libong pamilya sa buong rehiyon.
Layunin na suportahan ang mga komunidad na naapektuhan ng Habagat at Bagyong Crising, Dante, at Emong, naglaan ang DOLE CALABARZON, sa pakikipagtulungan ng lokal na pamahalaan at mga katuwang na ahensya, ng kabuuang PHP110,742,923.50 para sa implementasyon ng mga pangunahing programa nito, ang Tulong Panghanapbuhay sa Ating Disadvantaged Workers (TUPAD) at ang DOLE Integrated Livelihood Program (DILP).
Sa ilalim ng programang TUPAD, 12,120 indibidwal ang makikinabang mula sa inilaang P98,962,200.00 pondo.
Tatanggap ang mga benepisyaryo ng sahod batay sa pinakamataas na umiiral na minimum na sahod sa rehiyon at magiging bahagi sila ng 10-araw na gawain na nakatuon sa paglilinis at rehabilitasyon ng kanilang komunidad.
Kabilang sa mga lalawigan, ang Batangas ay tatanggap ng PHP 38,458,740.00 pondo pa-ra sa 6,442 benepisyaryo.
Makatatanggap ang lalawigan ng Rizal ng PHP 24,517,050.00 para sa 1,105 indibidwal, habang ang Quezon ay nakatakdang tumanggap ng PHP 18,643,560.00 para sa 1,668 benepisyaryo.
Nasa 1,492 ang makikinabang na benepisyaryo sa Cavite mula sa PHP 8,907,240.00, at ang Laguna ay pagkakalooban ng PHP 8,435,610.00 upang tulungan ang 1,413 indibidwal. Bukod dito, P11,780,723.50 kabuuang halaga ng tulong-pangkabuhayan ang ipagkakaloob sa 1,168 na benepisyaryo, bilang tulong sa mga indibidwal at organisasyon na makapagsimula ng negosyo upang muli nilang mabawi ang kanilang kabuhayan na nasalanta dulot ng kamakailang kalamidad.
Sa pamamagitan ng mga inisyatibang ito, patuloy na nagsusumikap ang DOLE upang isakatuparan ang pangako ng pamahalaan na hindi lamang makapagbigay ng agarang suporta sa kabuhayan kundi pati na rin upang itaguyod ang patuloy na pagbangon at patatagin ang mga komunidad na naapektuhan ng sakuna.
