MANILA, Philippines – Haharap sa Commission on Appointments (CA) si Transportation Secretary Vince Dizon at apat iba pang appointees sa constitutional commissions, sa pagbabalik ng sesyon ng Kongreso sa susunod na buwan.
Ayon kay Surigao del Sur lawmaker at governor-elect Johnny Pimentel, CA assistant minority leader, si Dizon ay nakatakdang suriin ng komisyon sa Hunyo 3.
“The CA’s committee on transportation has set a meeting to consider Secretary Dizon’s ad interim appointment,” aniya.
Dagdag pa niya, ang Kongreso ay magre-reconvene sa Hunyo 2, matapos ang apat na buwang recess. Sasailalim naman ito sa adjourn sine die sa Hunyo 14.
Matatandaan na itinalaga ni Pangulong Ferdinand Marcos Jr. si Dizon bilang kalihim ng Department of Transportation noong Pebrero 21, kasunod ng pagbibitiw sa pwesto ni Jaime Bautista.
Si Dizon ay nagsilbing Presidential Adviser on Flagship Programs and Projects at pinamunuan ang Bases Conversion and Development Authority sa ilalim ng Duterte administration.
Samantala, matapos na harapin ni Dizon ang CA, magtitipon naman ang Constitutional Commissions and Offices sa Hunyo 4 para pagdesisyunan ang ad interim appointments ng apat na bagong talagang opisyal ng Commission on Elections (Comelec), Commission on Audit (COA) at Civil Service Commission (CSC).
Sasailalim sa matinding pagsusuri ng CA sina Comelec Commissioners Noli Pipo and Maria Norina Tangaro-Casingall, na pumalit kina Marlon Casquejo at Socorro Inting; CSC Commissioner Luis Meinrado Pañgulayan, na pumalit kay Aileen Lourdes Lizada; at COA Commissioner Douglas Michael Mallillin, na pumalit kay Roland Pondoc.
“The public is encouraged to submit to the CA secretariat any information, written reports, or sworn/notarized complaints regarding the appointees,” sinabi ni Pimentel. RNT/JGC
