MANILA, Philippines – Humarap sa National Bureau of Investigation (NBI) nitong Huwebes si DPWH Davao Regional Director Juby Cordon upang tumugon sa subpoena kaugnay ng imbestigasyon sa mga flood-control project sa Davao.
Dumating si Cordon sa NBI headquarters sa Pasay City bandang alas-1 ng hapon, ngunit tumangging sagutin ang mga tanong ng media.
Ilang minuto matapos ang kanyang pagdating, nagsumite naman ang DPWH Davao Region ng 10 kahon ng mga dokumento na kailangan ng NBI sa imbestigasyon.
Inisyu ang subpoena kay Cordon matapos i-flag ni NBI Director Melvin Matibag ang 47 flood-control projects sa 1st District ng Davao City, na nasasakupan ni Rep. Paolo “Pulong” Duterte.
Nauna nang sinabi ni Matibag: “Merong ghost, may substandard, merong isang coordinate lang with five budgets na iba-iba lang ’yung title.”
Samantala, sinabi ni Duterte na bukas siya sa anumang imbestigasyon sa flood-control projects sa kanyang distrito, ngunit hindi umano ito dapat maging “selective.”
Kinuwestiyon din niya kung iimbestigahan ng NBI ang mga flood-control project sa distrito ng asawa ni Matibag na si Laguna Rep. Ann Matibag.
Sinabi naman ni Matibag na kung may ebidensiya si Duterte, “he is free to file a case so that we can investigate it properly.” RNT/MDS
