MANILA, Philippines – Muling pinagtibay ng Philippine Coast Guard (PCG) at Canadian Coast Guard (CCG) ang kanilang commitment na palakasin ang kooperasyong pandagat sa bilateral meeting noong Setyembre 17, 2026.
Tinalakay sa pulong ang maritime security, maritime domain awareness, capacity building at papel ng coast guards sa pagsusulong ng rules-based international order.
Binigyang-diin ng PCG ang estratehikong kahalagahan ng West Philippine Sea at ibinahagi ang mga update sa lumalawak nitong international partnerships at operational capabilities.
Ibinahagi rin ng PCG ang mga milestone nito, kabilang ang akreditasyon para sa high seas operations sa ilalim ng Western and Central Pacific Fisheries Commission (WCPFC), paglahok sa RIMPAC Exercise at pag-anib sa International Convention on Maritime Search and Rescue.
Tinalakay din ang mga oportunidad sa high seas operations, maritime domain awareness, training at professional education. Inimbitahan ng PCG ang CCG na makipagtulungan sa Philippine Coast Guard Admiral and Staff College.
Pinag-usapan din ang posibleng memorandum of understanding para sa academic exchanges, capacity building at leadership development.
Nagtapos ang pulong sa pangakong palawakin pa ang kooperasyon ng Canada at Pilipinas para mapahusay ang kaligtasan, seguridad at katatagan sa karagatan sa Indo-Pacific region. Jocelyn Tabangcura-Domenden
