MANILA, Philippines – Nanindigan si Senador Jinggoy Estrada na inosente siya sa mga alegasyon na nag-uugnay sa kanya sa mga anomalya sa flood control projects.
Ito ay kasabay ng nakatakdang pagbuklat ng Senado sa mga posibleng ebidensya na susuporta sa alegasyon ni dating Bulacan assistant district engineer Brice Hernandez.
Si Hernandez ay pinayagan ni Senate President Vicente “Tito” Sotto III na umalis sa detention facility ng Senado noong Sabado para mangalap ng ebidensya.
Nauna nang iniugnay ng dating Department of Public Works and Highways (DPWH) engineer sina Estrada at Senador Joel Villanueva sa maanomalyang flood control projects.
“Senator Estrada has always been firm and consistent in denying these allegations, and we remain confident that no evidence exists linking him to any supposed kickbacks in flood control projects,” saad sa pahayag ng tagapagsalita ni Estrada.
Nang tanungin kung mag-iinhibit si Estrada sa imbestigasyon ng Senado, sinabi ni Soriano na “There is no valid ground nor sound reason for Senator Estrada to inhibit from the Blue Ribbon Committee.”
“He has consistently denied the baseless allegations against him and remains committed to performing his duties with impartiality and integrity,” dagdag pa niya.
Nakatakda ang susunod na pagdinig ng komite alas-9 ng umaga ng Setyembre 23. RNT/JGC
