MANILA, Philippines – Maaari nang mag-verify ng kanilang identidad ang mga pensioner mula sa bahay gamit ang bagong facial authentication program ng Social Security System.
Inilunsad noong Marso 11, 2026, ang online system na ito upang maisagawa ang Annual Confirmation of Pensioners (ACOP) nang hindi na pumupunta sa opisina, lalo na para sa matatanda at nasa abroad, at masigurong tuloy-tuloy ang pension.
Ayon kay SSS President at CEO Robert Joseph de Claro, gumagamit ito ng facial recognition na konektado sa Philippine Identification System para makumpirma ang identidad.
May “liveness check” din upang matiyak na totoong tao ang gumagamit at maiwasan ang panlilinlang.
“This makes compliance easier, faster, and more secure, ensuring uninterrupted pension payments,” aniya.
Available ang system sa:
–Retirement pensioners edad 80 pataas sa Pilipinas
–Mga pensioner na nasa abroad
–Survivorship pensioners
Para gamitin ito:
–Pumunta sa SSS website
–I-click ang ACOP icon
–Sundin ang facial scanning gamit ang cellphone, tablet, o computer na may camera
Konektado ito sa eVerify platform ng Philippine Statistics Authority at karaniwang natatapos sa loob ng isang minuto, na agad nag-a-update ng records.
Mahalaga ang ACOP dahil taunang requirement ito upang patunayang kwalipikado pa ang pensioner; kung hindi, maaaring maantala o mahinto ang pension.
Para sa walang gadget o internet, maaari pa ring mag-ACOP sa pamamagitan ng SSS branch E-Centers, video call verification, o personal na pagpunta kung kinakailangan.
Ayon sa SSS, bahagi ito ng pagpapabuti ng serbisyo para sa halos apat na milyong pensioners sa loob at labas ng bansa. RNT/MND
