MANILA, Philippines – Hinikayat ni Senator-judge Alan Peter Cayetano ang Senado na bigyan ng parehong prayoridad ang imbestigasyon sa lahat ng anomalya, kabilang ang eskandalo sa flood control project, tulad ng ginagawa sa impeachment trial ni Vice President Sara Duterte.
Sa isang media interview matapos ang unang araw ng impeachment trial nitong July 6, sinabi ni Cayetano na hindi lang ang impeachment trial ang pamantayan ng pananagutan ng mga opisyal ng gobyerno.
“People should demand better government. People should demand total accountability. We’re here, we’re present, we’re going to hold the Vice President accountable. But let’s also hold accountable lahat ng involved sa flood control [controversy],” sabi niya.
Kinuwestiyon din ni Cayetano kung bakit wala pang pag-usad ang imbestigasyon ng Senate Blue Ribbon Committee kaugnay ng umano’y mga iregularidad sa mga flood control project.
“Kung ma-schedule natin nang 30 weeks na tuloy-tuloy ’yung trial, bakit hindi ma-schedule ’yung [pagtalakay ng] flood control sa Blue Ribbon Committee at ilabas kung sino ’yung mga talagang witnesses?” wika ni Cayetano.
Hinimok din niya ang publiko na subaybayan ang impeachment trial at unawain ang mga isyung tinatalakay sa tulong ng mga legal na eksperto.
“Tiyagain niyo lang po, day by day. Hopefully ’yung mga [law school] deans [at] ’yung mga legal experts [ay] ma-explain nila [ang impeachment trial] in a non-partisan way,” aniya.
Ayon pa kay Cayetano, dapat ding ipagpatuloy ng Senado ang legislative work nito at ang tungkulin nitong magsagawa ng oversight kahit nagpapatuloy ang impeachment trial.
