MANILA, Philippines – Sinabi ng Malakanyang na ini-enjoy pa rin ni dating Tourism Secretary Christina Garcia Frasco ang tiwala ni Pangulong Ferdinand Marcos Jr., sa kabila ng pagkakalipat sa kanya sa bago niyang posisyon bilang Presidential Adviser for Sustainable and Resilient Communities.
Sinabi ni Presidential Communications Office (PCO) Undersecretary at Palace press officer Claire Castro, nananatili ang kumpiyansa ni Pangulong Marcos sa kakayahan ni Frasco na bitbitin ang kanyang bagong responsibilidad sa bago nitong papel.
“First of all, Secretary Frasco still has the trust given by the President. The President knows that she can perform the tasks given to her,” ayon kay Castro sa press briefing sa Cebu.
Matatandaang, kamakailan ay pormal nang itinalaga ni Pangulong Marcos si Frasco bilang Presidential Adviser for Sustainable and Resilient Communities, matapos ang ilang linggong espekulasyon hinggil sa kaniyang pagbibitiw bilang kalihim ng Department of Tourism.
Pangungunahan ni Frasco ang pagpapalakas ng pagpapatupad at tuloy-tuloy na pagsasakatuparan ng mga prayoridad na pambansang programa sa antas ng komunidad, partikular sa mga lugar na madalas tamaan ng kalamidad at climate-related risks.
Kabilang din sa mandato ni Frasco ang gawing mas madali at mabilis ang pagkakahanay ng mga government initiatives at makipagtulungan sa national agencies, local government units (LGUs), at stakeholders.
“Facilitate the integration and alignment of national government initiatives… aimed at promoting sustainable and resilient communities,” ang winika ni Castro.
Naniniwala aniya ang Pangulo na akma si Castro sa bago niyang puwestol dahil na rin sa kanyang karanasan na makatrabaho ang lokal na pamahalaan.
Samantala, hanggang ngayon ay wala pa ring ideya si Castro kung sino ang napipisil ng Pangulo na ipapalit kay Frasco sa iniwan nitong posisyon sa Department of Tourism.
“As of now, we have not yet discussed about the replacement for the position. Let’s just wait, maybe in the next few weeks,” aniya pa rin.
Noong nakaraang linggo, inihayag ni Castro na pansamantalang pamumunuan ni Undersecretary Verna Buensuceso ang DOT blang officer-in-charge. (KRIS JOSE)
