MANILA, Philippines – Posibleng matapos sa katapusan ng Mayo ang impeachment proceedings ng House of Representatives of the Philippines laban kay Vice President Sara Duterte, ayon kay San Juan Rep. Ysabel Maria Zamora.
Ayon kay Zamora, na vice chair ng House Committee on Justice, inaasahang maaabot ng komite ang 60 session days na palugit mula nang i-refer ang mga impeachment complaints, kaya target nilang matapos ito sa end of May.
Noong Pebrero 23, apat na verified impeachment complaints ang na-refer sa komite, kung saan dalawa ang nananatiling aktibo habang patuloy na sinusuri kung may “probable cause.”
Sinabi ni Zamora na mahalaga ang timeline dahil ipinapakita rin ng komite na patas at walang kinikilingan ang proseso, sa gitna ng matinding pulitika at public scrutiny.
“The congressmen have read the complaints, and they believe that we are correct in declaring it to be sufficient in form, sufficient in substance, and that the affidavits or the annexes to the complaints are sufficient to show that there is probable cause. Of course, like we said, we will still have to go through the Committee on Justice hearing to declare probable cause,” aniya.
Dagdag niya, kahit naniniwala ang ilang kongresista na may basehan ang kaso, dadaan pa rin ito sa hearings bago makapagdesisyon sa probable cause at posibleng rekomendasyon sa plenaryo.
“The House’s submission of the articles of impeachment against Duterte will trigger a Senate impeachment trial,” na siyang magdedesisyon kung mananatili siya sa puwesto.
Isa rin sa magiging mahalagang testigo sa pagdinig si Ramil Madriaga, na umano’y dating bagman ni Duterte.
Pinunto ni Zamora na ang usapin sa kredibilidad ng testigo ay dapat pag-usapan sa loob ng komite at hindi sa labas nito.
“Ang stand po namin sa Committee on Justice as regards allegations that Madriaga is of questionable character, kaya nga po tayo nag-hearing,” ani Zamora.
Dagdag pa niya, wala pang naide-deklarang probable cause at wala pang pormal na articles of impeachment.
“Wala pa naman kaming sinasabing may probable cause na… In fact, wala pang articles of impeachment,” aniya.
Ayon sa kanya, magkakaroon lamang ng articles of impeachment kapag nagdesisyon na ang komite na may sapat na batayan ang reklamo at naipasa ito sa plenaryo ng Kamara. RNT/MND
