MANILA, Philippines- Inimbitahan ng Palasyo ang halos lahat ng senador sa isang “dinner” na pinangunahan nina Pangulong Bongbong Marcos Jr. at First Lady Liza Araneta-Marcos sa Bahay ng Pangulo nitong Lunes, pagkatapos ng National Rally for Peace ng Iglesia ni Cristo.
Ngunit, marami ang nagtataka kung bakit hindi inimbitahan ng Palasyo sa dinner si Senador Imee Marcos, pangunahing tagapagtanggol ng pamilya Duterte partikular si Vice President Sara Duterte at kapatid ni Pangulong Marcos.
Ayon kay Imee, hindi nakatanggap ng imbitasyon ang kanyang tanggapan hinggil sa dinner na pinangunahan ng First Lady.
Wala nang iba pang sinabi si Imee hinggil dito.
Ngunit, ayon kay Senate President Francis “Chiz” Escudero, inimbitahan ang lahat ng senador sa dinner pero nilinaw niyang dapat beripikahin ito sa staff member sa Office of the President sa Malacañang.
“To my knowledge, all members were invited but you have to ask the Palace Protocol to confirm because they were the ones that sent the invites and am just a mere invitee,” ayon kay Escudero.
Bukod dito, sinabi pa ni Escudero kabilang sina Senate Minority Leader Aquilino “Koko” Pimentel III at Senador JV Ejercito na pawang “sosyalan” lamang at walang kahalong politika ang pagtitipon sa Palasyo.
“It was purely socials and part of the regular/seasonal gathering between the members of the Senate and the President,” ayon kay Escudero sa Viber message.
Ibinahagi rin ni Ejercito ang kanyang pananaw sa naturang dinner sa pagsasabing “purely socials” ang naganap na walang kinalaman sa rally ng INC sa Quirino Grandstand noong Lunes at kung walang tinalakay ng panukalang batas.
“Not at all. Purely socials. We didn’t even discuss any political issue,” giit ni Ejercito.
Ipinagtanggol din ni Pimentel na walang kinalaman ang dinner sa naganap na rally na dahil ilang buwan nang itinakda ang naturang pagtitipon.
“Not pre-determined or influenced by any other event,” ayon kay Pimentel.
Kabiyak ni Pimentel si Ma. Anna Kathryna de Guzman Yu na pawang itinalaga ni Marcos bilang Special Envoy to the United Arab Emirates for Trade and Investments.
Sa kanyang social media post, nakita sa mga larawan na inilagay ni First Lady Liza Araneta Marcos ang ilang senador at kabiyak nito.
Bukod kina Escudero, Ejercito, at Pimentel, kasama sa photo ni First Lady sina Senador Ramon Revilla Jr., Lito Lapid, Francis Tolentino, Sherwin Gatchalian, Raffy Tulfo, Joel Villanueva, Mark Villar, Jinggoy Estrada, Cynthia Villar, Alan Peter Cayetano, Pia Cayetano, Nancy Binay, Juan Miguel Zubiri, Loren Legarda, at Robin Padilla.
Dumalo din sa dinner si Senador Grace Poe, pero hindi nakasama sa photo session. Ernie Reyes