MANILA, Philippines – Kumpiyansa si House Deputy Speaker at La Union 1st district Representative Paolo Ortega na magpapatuloy ang impeachment trial laban kay Vice President Sara Duterte sa kabila ng nagpapatuloy na drama sa Senado na magsisilbing impeachment court.
Ani Ortega, umaasa siyang huhupa na ang tensyon bago magsimula ang paglilitis sa Hulyo 6, 2026.
“When the dust settles, kapag nawala na itong bangayan, nagka-igihan na sila o nagka-usap, umpisahan na natin itong impeachment na trial. Kung ano man ang resulta niyan, importante po masagot yung tanong ng taong bayan,” sinabi ni Ortega sa panayam ng DZBB.
“At the end of the day, ang importante ay ma-resolve nila yung issues. Kahit si Senator Alan Cayetano, sinabi niya na ‘forthwith’ ang impeachment, so wala rin akong nakikitang rason na hindi masunod yung calendar na July 6,” dagdag pa niya.
Samantala, naniniwala naman si Ortega na ang kaguluhan sa Senado ay mareresolba agad.
“Gusto namin talaga ma-resolve na nila yung internal issues nila […] Umaasa kami na magkakaroon ng peaceful na resolution ‘to, sana sa mas lalong madaling panahon po makapag-usap na sila.”
Samantala, sinabi na ni dating senate president Franklin Drilon na maaari pa ring magpatuloy ang impeachment trials laban kay Duterte kahit na 12 senador lamang ang dumalo.
“’Yung 16 ay kailangan lamang sa judgement of conviction. Sa pang araw-araw na paglilitis ng impeachment trial, hindi kailangan ang 16. Ang kailangan ay quorum lamang. Ang quorum sa Senado siya rin ang quorum sa impeachment court. Kaya hindi pwede na walang 16 dahil ang quorum sa ngayon ay tinatanggap na 12 lang,” ani Drilon. RNT/JGC
