COTABATO CITY – Tiniyak ng Commission on Elections ang integridad ng magiging resulta ng unang regular parliamentary elections sa Bangsamoro Autonomous Region in Muslim Mindanao matapos makumpleto nang maayos ang final testing and sealing ng mga vote-counting machines na gagamitin sa botohan sa Setyembre 14.
Ayon sa Comelec, mahalaga ang testing at sealing upang matiyak na nasa maayos na kondisyon ang lahat ng makinang gagamitin sa halalan at handa ang mga ito na tumpak na magtala, magbilang at magpadala ng mga boto sa araw ng eleksyon.
Sinabi ni Comelec Chair George Garcia na isinagawa noong Setyembre 12 ang final testing and sealing ng lahat ng VCM na nakalaan para sa BARMM upang agad na matukoy at maresolba ang anumang posibleng teknikal na problema bago ang aktuwal na botohan.
“Sinubukan po natin ‘yung lahat ng makina kung gumagana, bumibilang ba ng tama,” ani Garcia sa isang panayam.
Ipinaliwanag pa ni Garcia na bahagi ng proseso ang pagtiyak na walang hindi awtorisadong programa o instruction na naka-install sa mga makina na maaaring makaapekto sa integridad ng pagboto at bilangan ng mga boto.
“Mas mahirap po kasi kung ang makina ay doon mo pa lang susubukan sa mismong araw ng eleksyon,” dagdag niya.
Itinuturing ng Comelec ang final testing and sealing bilang mahalagang hakbang sa paghahanda sa halalan upang matiyak ang maayos na paggana ng mga VCM bago ihatid ang mga ito sa mga polling center sa buong rehiyon.
Matapos ma-validate at mabigyan ng clearance ang mga VCM, sinabi ng mga election official na handa na ang BARMM para sa isang maayos, malinaw at mapagkakatiwalaang halalan habang ihahalal ng mga botante ang mga magiging miyembro ng unang regular na Bangsamoro Parliament.
Nakatutulong din ang testing at sealing upang mabawasan ang posibilidad ng mga teknikal na aberyang maaaring makaapekto sa proseso ng pagboto, bilangan at pagpapadala ng mga resulta.
Inaasahang masasaksihan ng mga kinatawan ng mga partidong politikal, kandidato, poll watcher, citizens’ arms at civil society organizations ang testing at sealing bilang bahagi ng mga hakbang ng Comelec upang matiyak ang transparency sa proseso ng halalan.
Bukod sa mga teknikal na paghahanda, nakumpleto na rin ng Comelec ang pagpapakalat ng mga election personnel, pamamahagi ng mga kagamitang panghalalan at koordinasyon sa mga security forces na magbabantay sa mga polling center sa buong BARMM.
Ang halalan sa Setyembre 14 ang magiging unang regular parliamentary elections sa BARMM at magmamarka sa paglipat ng rehiyon mula sa Bangsamoro Transition Authority (BTA) tungo sa isang ganap na halal na parliamentary government.
Nauna nang sinabi ni Special Assistant to the President (SAP) Anton Lagdameo na itinuturing ni Pangulong Ferdinand R. Marcos Jr. ang halalan bilang bunga ng ilang dekadang pagsisikap para sa kapayapaan sa Bangsamoro at isang makasaysayang hakbang para sa rehiyon at sa buong bansa.
Sa pagpasok ng huling yugto ng paghahanda para sa halalan, nakatuon na ang Comelec at iba pang election stakeholders sa pagtiyak na magiging maayos, mapayapa, transparent at mapagkakatiwalaan ang pagboto, bilangan at pagpapadala ng mga resulta sa buong BARMM. RNT
